Бу йил таълим соҳасида амалга оширилаётган ислоҳотлар нафақат соҳа мутахассисларини, балки бошқа касб эгаларини ҳам бефарқ қолдирмади. Бу бежиз эмас, албатта. Чунки фарзандларимизга ҳозирдан пухта ва сифатли таълим-тарбия берсак, келажакда улар заковатли, билимли, энг муҳими, ўз касбининг чинакам усталари бўлиб етишишади. Президентимизнинг “Келажакка йўлланма: маънавий янгиланиш” мақоласида таъкидланганидек, рақобатбардош миллатни шакллантиришга бугунданоқ киришиш лозим.
Сайрам тумани таълим муассасаларида фарзандларимизга тўлақонли билим беришга жиддий эътибор қаратилган, десак, янгишмаймиз. Яқинда Манкентдаги тажрибали мутахассис Музаффар Абдусатторов етакчилик қилаётган Иброҳим ота номли ўрта мактабда педагоглар жамоаси фаолияти билан яқиндан танишгач, бунга яна бир карра ишонч ҳосил қилдим.
Ушбу таълим муассасасида жами 963 ўқувчига 110 ўқитувчи сабоқ бермоқда. Бошқа жойлардаги каби 1,2,5 ва 7-синфларда ўқитишнинг янгиланган усули жорий этилган.
– Ўзингизга маълум, келаси ўқув йилидан бошлаб, баъзи фанлар бўйича дарслар инглиз тилида олиб борилади. Бунинг учун, биринчи галда, педагогларнинг ўзлари ўта саводли бўлишлари керак. Чунки, ҳозирги замонда ўқувчининг фикр доираси ҳам анча кенгайиб кетган. Демак, ҳақиқий педагогнинг ўзи устида тинимсиз ишлаши, доимо изланишда бўлиши – давр тақозоси. Акс ҳолда, замондан орқада қолиши мумкин. Ўтган йилдан бошлаб айрим фан ўқитувчилари махсус курсларда таҳсил кўришди. Бундан ташқари, тинимсиз изланишаяпти. Ўйлайманки, ёшларга тўлақонли билим беришга устозларимизнинг билим ва малакаси етарли, – дейди М. Абдусатторов.
Муаллимларнинг бундай изланишлари, табиийки, ўз натижасини кўрсатяпти. Чунончи, ўтган ўқув йилида минтақавий фан олимпиадаларида иштирок этган 33 ўқувчидан 15 нафари совриндорлар сафидан жой олса, туман миқёсидаги олимпиадада етти нафари ғолибликни қўлга киритди. 11-синф ўқувчиси Ҳилола Тошметова биология фанидан туман олимпиадасида биринчи ўринни эгаллаб, вилоят танловига йўлланма олди.
Бундан ташқари “Ақбўта”, ”Русский медвежонок”, Кенгуру лингвист”, ”Кенгуру”, ”Самуриқ”, ”Золотое руно” сингари Халқаро танловларда ушбу мактабдан 130 ўқувчи қатнашиб, тегишли сертификатларга эга бўлишди. Ўқувчиларнинг муваффақиятларида устоз-муаллимларнинг ўзига яраша хизматлари бор. Кўп йиллардан бери ёшларга тўғри йўл кўрсатиб, оқ-қорани танитаётган, қалби меҳрга тўла устозлар қаторига ҳеч иккиланмай директорнинг ўқув ишлари бўйича муовинлари Абдулла Ниёзалиев, Фахриддин Алимбоев, тарбиявий ишлар бўйича ўринбосари Саида Жонназарова, фан ўқитувчиларидан Гулнора Анортоева, Ҳусниддин Каримов, Меҳринисо Қавлонова, Шаҳзода Бўзова, Муқаддас Тўламетова, Анормат Йўлдошев ва бошқаларни қўшиш мумкин.
30 йиллик иш тажрибасига эга яна бир муаллима Зулфия Эргешованинг 1-"А" синфда янгиланган дастур асосида дарс ўтишини кузатарканмиз, болаларнинг анча фаол ва дадил эканликларини пайқадик. Ўқитувчининг таъкидлашича, бу усул олдингиларидан фарқли ўлароқ, болани эркин фикрлашга, фаолроқ бўлишга ундаркан. Мабодо шогирд ўқитувчининг саволига тўлақонли жавоб беролмаса ҳам уни уришмасдан, аксинча, ижобий хислатларини айтиб, рағбатлантирилади. Қарабсизки, келаси дарсда ўша ўқувчи янада яхшироқ ўқишга ҳаракат қилади. Айтганча, ҳамкасблари бу тажрибали устозни таваллуд айёмлари билан муборакбод этаётганининг устидан чиқдик ва ўзимизнинг самимий истакларимизни баён қилдик.
Мавриди келганда, ўта талабчан, шу билан бирга ҳамкасбларининг оғирини енгил қилишга ҳамиша тайёр мактаб директорининг жамоадаги ўрни ва ролини қайд этишни истардим. Музаффарнинг педагоглар жамоасига раҳбарлик қилаётганига анча вақт бўлди. Бир пайтлар туманга четдан келган янги ҳоким мазкур мактабга ўзига маъқул бўлган мутахассисни директорликка тавсия қилганида жамоа бир ёқадан бош чиқариб, М. Абдусатторовни ёқлаган ва ниҳоят, ҳокимни ўз фикридан қайтаришга эришган эди. Устозлар ўша пайтдаёқ тўғри йўлни танлашгани ҳозирга келиб ўз исботини топмоқда. Бу, ўз навбатида, мактаб жамоасининг аҳиллигидан далолат беради.
Фурсатдан фойдаланиб, жамоанинг барча аъзоларини Ўқитувчилар куни билан қизғин муборакбод этаман.