Шимкент шаҳар маслаҳатининг яқинда ўтган навбатдаги сессиясида депутатлар Мустақил Қозоғистонимизнинг, вилоятимизнинг, шу жумладан, Шимкент шаҳрининг ижтимоий-иқтисодий, маданий ва бошқа соҳалари ривожига салмоқли ҳисса қўшган, аҳолининг турмуш даражасини юксалтириш борасидаги кўп йиллик самарали хизматлари учун ҳамюртларимиздан бир гуруҳига Шимкент шаҳрининг Фахрий фуқароси унвони берилди. Бундай шарафли номга лойиқ бўлганлар орасида Сембиғали Алимбеков, Тасқинбай Бурлибаев, Нурмахан Жўлдасов, Бўлат Жилқишиев, Сатибалди Ибрагимов, Саттар Қуашбай, Абдуқаҳҳор Пайзахметов (Файзаҳмедов), Исамудин Рисбай, Сергей Терещенко, Зауитбек Турисбеков каби эл оғалари бор.

Тақдирланганлар қаторида ўзининг самарали меҳнати, заковати, бунёдкорлиги, истеъдоди, саховати ва бошқа ажойиб фазилатлари билан элимизга танилиб, Элбошимиз Нурсултан Назарбаев ҳамда ҳукуматимиз, вилоятимиз раҳбарлари назарига тушган, “Олтин юрак” нишони, “Қозоғистон Республикаси меценати” унвони соҳиби, Шимкентнинг асл фарзанди, тадбиркорлар саркори, Абдуқаҳҳор Ҳошим ўғли (тасвирда)нинг борлиги барчамизни қувонтирди.

Фурсатдан фойдаланиб, “Жанубий Қозоғистон” газетасининг ривожига ҳам салмоқли ҳисса қўшиб келаётган саховатпеша инсон Абдуқаҳҳор Файзаҳмедовни юксак унвон билан қутлаб, ишларида улкан зафарлар тилаб қоламиз.