Вилоятимизда қишлоқ хўжалик соҳаси жадал ривожланмоқда. Минтақага 75та индикаторли ширкат қуриш топширилган бўлса, бу режа ортиғи билан бажарилди.

Турли йўналишлар бўйича фаолият юритадиган 158 деҳқон хўжалиги барпо этилди. Шулардан бири – сармоявий лойиҳа асосида тузилган Тўлебий туманидаги «Леңгір құс» паррандачилик ширкатидир. Жамоада 20 нафар тадбиркор бор. Уларга Киелитас қишлоқ округи ҳудудидан берилган 2,5 гектар ерга инфратузилма юритилиб, шу кунларда қурилиш ишлари қизғин олиб борилмоқда. 

Парранда гўшти етиштирадиган ширкат аъзолигига номзодлар танлов орқали қабул қилинди. Раисликка таниқли тадбиркор Дина Суттибаева тайинланди. 

– Кўп йиллар хусусий тадбиркор бўлиб ишладим, лекин ширкатга бирлашишнинг фойдаси мўл эканига ишонч ҳосил қилдим. Соҳага субсидия ажратилмоқда. Паррандачилик фермасида фақат 2 одам ишлайди, чунки бу ердаги барча иш жараёнлари автоматлаштирилган. Ҳозир режадаги 20та паррандачилик фермасидан 7таси тайёр. Қурилишга 42 млн. тенге маблағни «Ырыс» кичик молия ташкилоти берди, – дейди Д. Суттибаева.

– Тадбиркорларимизга давлат томонидан 50 фоизли имтиёз берилади. Масалан, ферма ускуналарига 7 млн. тенге сарфланса, унинг 3,5 млн. тенгесини давлат тўлайди. Бундан ташқари, ем-хашак сотиб олиш учун тоннасига 20 минг тенгедан бериб турилади, – дейди вилоят қишлоқ хўжалик бошқармаси бошлиғи ўринбосари Нуржигит Мирзахметов.

Фабрика тўлиқ қувват билан ишласа, йилига 160 тонна парранда гўшти етиштирилади.