Таниқли режиссёр, жамоат арбоби, Ш. Айтматов номидаги Халқаро мукофот совриндори Қуандиқ Қасимовнинг 60 йиллик таваллуд айёми Тараз шаҳридаги вилоят қозоқ драма театрида кенг нишонланди. Тадбирда республика Театр арбоблари уюшмаси раиси Т. Жаманқулов бошчилигидаги мутасадди раҳбарлар, мамлакатимиздаги қатор театр жамоалари, драматурглар, шунингдек, И. Ҳошимжонов раҳбарлигида республикамиздаги ягона ўзбек драма театри жамоаси иштирок этишди.

Таъкидлаш жоизки, дўстликни қадр тутиб, юбилярни қутлаш учун ташриф буюрган ўзбек драма театри жамоаси ижро этган “Сайрам бозори” миллий фольклор кўринишидаги қўшиқ ҳаммага кўтаринки кайфият бағишлаб, давомли қарсаклар билан кутиб олинди. Ижро давомида улар Қуандиқ Қасимовнинг кифтига ўзбекона зарбоф тўн ёпиб, бошига дўппи кийдиришди, белига қийиқча боғлашди. Албатта, бу ҳолат тадбирга ажиб файз киритиб, тадбирнинг эсдан чиқмас лаҳзаларига айланди.

Ёдингизга солсак, таниқли режиссёр жорий йил вилоят ўзбек драма театрида “Шоҳ Эдип” трагедиясини юқори савияда саҳналаштириб, томошабинлар олқишига сазовор бўлган эди. Театр актёрлари Қ. Қасимовдан олган сабоқларидан мамнун.