Жаҳон саёҳат ва туризм кенгаши (World Travel and Tourism Council – WTTC) эълон қилган янги ҳисоботда Қозоғистон туризм тармоғи жадал ривожланаётган давлатлар рўйхатига киритилди. Бунга сабаб – вилоятимизда сайёҳлик ташкилотлари ва дам олиш масканлари сонининг йилдан йилга ортиб бориши, замонавий меҳмонхоналар, сервис хизмати сифати тобора яхшиланиб бораётгани ва шу каби кенг қамровли тадбирлар самарасидир.
Тўлебий туманида 100дан зиёд тарихий ва табиий қадамжолар мавжуд. Шу кунларда Буюк Ипак йўлида жойлашган туман халқаро туризмни ривожлантириш учун энг қулай минтақалардан бирига айланмоқда. Республикада биринчи бўлиб сайёҳлик ташкилотларнинг ушбу туманда ташкил этилиши бежиз эмас. Тўлебий туманининг Бургулик овулида Қорахонийлар даврида қурилган қалъа топилди. Султонработ қалъаси давлат томонидан ҳимояланган. Қоратепа қишлоқ округида эса қадимий ғорлар топилиб, ундаги ёзувлар ўрганилмоқда. Буларнинг барчаси хорижлик сайёҳларни туманга жалб этмоқда.
Вилоят ҳокими таъкидлаганидек, туризм барқарор иқтисодий ривожланишнинг муҳим омилларидан ҳисобланади. Ушбу соҳа аҳолининг турмуш даражасини ошириш, қўшимча иш ўринларини яратиш ва халқаро алоқаларни мустаҳкамлаш имконини беради. Шу боис, туманда мазкур тармоқ салоҳиятидан янада самарали фойдаланишга йўналтирилган чора-тадбирлар белгиланиб, муваффақиятли амалга ошириляпти. Жумладан, янги сайёҳлик йўналишлари ишлаб чиқилмоқда, мавжуд транспорт коммуникациялари қайта таъмирланиб, янгилари барпо этиляпти.
Туристик йўналишлар ҳам турлича – Қўржансой, Шувилдақ, Дарвоза, Новвотсой, Ақтуек, Суиқсай, Қасқасу, Сусинген кўли, Бургулик, Сайрамсу бўйлаб отда ёки пиёда сайр қилиш мумкин. Тоғ яйловларида меҳмон уйлари, этноовуллар барпо этилди. Натижада, туманга сўнгги йилларда Европа, Эрон, Арабистон, Африка ва Америка давлатларидан минглаб сайёҳлар келишмоқда. Бундай натижаларга осонликча эришилгани йўқ, албатта. Сайёҳлар имкони борича кўпроқ туристик иншоотларни томоша қилишлари учун барча қулайликлар яратилмоқда. Меҳмон уйларнинг меҳмонхоналардан фарқи шуки, меҳмонлар бу ерда аҳолининг турмуш тарзини ўрганиш имкониятига эга.
Меҳмонлар маҳаллий аҳоли билан яқиндан танишадилар, халқнинг урф-одатлари, маданиятини ўрганишга имкон бор. От миниб тоққа чиқишни истаганларга қишлоқ аҳли ўз хизматларини таклиф этишади. Буни туристик адабиёт классиги М. Биржаков воқеий сайёҳлик деб номлаган. Воқеий туризм маданий туризмнинг бир қисми бўлиб, сайёҳлар унда спорт, альпинизм билан шуғулланиб, ўтказиладиган кўнгилочар тадбирларда иштирок этиб, маҳаллий аҳолининг турмуш тарзи билан яқиндан танишадилар. Шунинг учун ЭКСПО-2017 кўргазмасида воқеий туризм йўналиши танланган. Демак, туризм, ўз навбатида,аҳоли бандлигини таъминлаш ва минтақалар иқтисодиётини ривожлантиришда муҳим соҳага айланиб бормоқда, десак, муболаға бўлмайди. Бир сўз билан айтганда, халқаро туризм ривожланган ва ривожланаётган туманлар иқтисодиётини мустаҳкамлай оладиган кўп тармоқли, йирик саноат тури кўринишидаги кучга айланди.
– Маълумки, қадимда аҳолининг савдо-сотиқ билан шуғулланиш, таълим олиш, муқаддас жойларни зиёрат қилиш мақсадида ўз юртларидан йироқ жойларга сафар уюштириши натижасида вужудга келган бу соҳа ўрта асрларга келиб, айниқса, Осиёда шаҳарсозликнинг ривожланишига, жумладан, карвонсаройлар, мадрасалар, бозорлар ва йўлларнинг қурилишига сабаб бўлди, – дейди туманда туризм соҳасини ривожлантиришга ҳисса қўшган тарихчи Асет Кембаев. – Ҳозирги кунда ўнлаб мамлакатлар туризмни кўп тармоқли, аҳолининг асосий қисмини иш билан таъминлайдиган йирик саноат турига айлантирдилар. Тан олиш жоиз, мустақиллик йилларида катта туристик салоҳиятга эга бўлган мамлакатимизда қадимий ёдгорликларни реконструкция қилиш, маҳаллий туроператорларни қўллаб-қувватлаб, уларга ўз фаолиятларини амалга ошириш учун зарур шарт-шароитлар яратиш, жойларда соҳага оид инфратузилмани барпо этиш, шунингдек, туризмнинг бошқа йўналишларини ривожлантиришга алоҳида эътибор қаратилдики, натижада Буюк Ипак йўли чорраҳасида жойлашган юртимиз сон-саноқсиз осори-атиқалари, урф-одатлару миллий таомлари, бетакрор табиатини бутун дунёга намоён қилиш имкониятига эга бўлди. Бу эса бой тарихга эга юрт ва замон билан ҳамнафас яшаётган мамлакат сифатида эътироф этилувчи Қозоғистонни ўз кўзи билан кўрмоқчи бўлган сайёҳлар сонининг йилдан йилга ортиб боришига хизмат қиляпти.
Туманга келаётган сайёҳлар интернетдаги ижтимоий тармоқларда ўлкамиз ҳақидаги таассуротларини ёзмоқда. Улардан бир нечтасини эътиборингизга ҳаволи қиламиз.
Ежи Шлука, “BohemaLazne” компанияси директори (Чехия):
“Тўлебий туманида бир ҳафта давомида бўлиб, туризм инфратузилмаси изчил ривожланаётгани ва сервис хизмати халқаро андазаларга тўла мос эканлигига гувоҳ бўлдим. Меҳмондўст халқнинг миллий маданияти ва қадриятлари билан танишиб, ҳайратим ва ҳавасим ғоят ошди. Мамлакатингиздаги тинчлик ва осойишталик, қадимий маданий ёдгорликлар, бугунги тараққиёт ва улкан бунёдкорлик ишлари, халқингизнинг урф-одатлари, миллий таомлари европаликларни ўзига жалб этмоқда”.
Валентина Малая, «Sayamatravelgroup» компанияси савдо директори (Таиланд):
“Тўлебий туманидаги миллий таомлар, хушманзара табиатдан баҳраманд бўлиб, озода ва кенг кўчаларда сайр қилиш ҳар қандай кишига завқ бағишлайди.
Батирбек Рахметов, “Петропавл” сайёҳлик ташкилоти раҳбари:
Туркистон, Сайрам каби шаҳар ва қишлоқларларга саёҳат қилувчилар тобора кўпайиб бораётгани ҳақида эшитгандим, бу жойларда кўп маротаба бўлганман. Мана энди сайёҳлик чегараси кенгайиб, Тўлебий тумани ҳам бу қаторга қўшилгани қувонарли ҳолдир. Мамлакатимизда сайёҳликнинг, жумладан, ички туризмнинг ривожланиши хусусий шўъбанинг тараққий этиши, янги иш ўринлари очилиши, иқтисодиётимизнинг ва халқимиз фаровонлигининг янада юксалишига хизмат қилмоқда.