Астанадаги Тинчлик ва тотувлик саройида Меҳнат куни ва Ижтимоий муҳофаза соҳаси ходимлари кунига бағишланган “Оммавий меҳнат жамияти сари” республика форуми ўтди.
Тантанали йиғинда Қозоғистон Республикаси Давлат котиби Гулшара Абдихалиқова ва Меҳнат ва аҳолини ижтимоий муҳофазалаш вазири Тамара Дуйсеновалар қатнашди. Тадбир доирасида Меҳнат кунига бағишланган фотокўргазма, “Меҳнат йўли” ва “Ижтимоий муҳофаза соҳасининг илғор ходими” танловларининг ғолибларини тақдирлаш маросими ўтиб, меҳнат фахрийлари ардоқланди. Анжуман доирасида Қозоғистон иқтисодиётининг гуллаб-яшнашига улкан ҳисса қўшган 8 нафар фахрий “Меҳнат фахрийси” медали билан тақдирланди.
ҚР Давлат котиби Гулшара Абдихалиқова дастлаб СССР Халқ артисти, СССР ва Қозоғистон Давлат мукофоти совриндори Бибигул Тўлегеновага “Меҳнат фахрийси” медалини топширди.
– Биз 2014 йилдан бошлаб Меҳнат кунини атаб ўтмоқдамиз. Бу байрам – ватанимизнинг гуллаб-яшнашини таъминлайдиган одамларнинг меҳнатига ҳурмат белгиси. Шунингдек, бу кун ижтимоий ва иқтисодий муваффақиятларимизни намойиш қиладиган кун. Мамлакатимизнинг ҳар бир фуқароси меҳнатни улуғлаши лозим. Шундагина Қозоғистон дунёда энг ривожланган давлатларнинг сафига кира олади. Келажакда миллатнинг ютуғи инсон омилининг сифати билан ўлчанади, – деди Давлат котиби.
Ундан кейин тақдирланган тиббиёт фанлари профессори Мақаш Алияқпаров соғликни сақлаш соҳасида 49 йил меҳнат қилиб, кўплаб илмий мақолалар ёзган. Мазкур унвонга, шунингдек, Қаншай Жўлдибаева, Серикбўл Ўналов, Ануар Тукенов, Жакен Таймағамбетов, Николай Удалов, Сергей Чекалин каби катта авлод вакиллари мушарраф бўлди.
Шундан сўнг, Меҳнат ва аҳолини ижтимоий муҳофазалаш вазири Тамара Дуйсенова маъруза қилди.
– Бугун юртимиз иқтисодиётининг турли соҳаларида хизмат қилиб келаётган 8,5 миллиондан зиёд фуқароларнинг байрами. Элбоши ўзининг “Оммавий меҳнат жамияти сари йигирма қадам” мақоласида дунёвий тараққиётнинг барча қадриятлари инсон меҳнати орқали бунёд этилиши алоҳида таъкидлаган. Дарҳақиқат, мустақилликни қўлга киритгандан кейинги чорак асрга назар ташлайдиган бўлсак, мамлакатимизда 7,5 минг чақирим йўл қурилиб, 113 млн. квадрат метрдан зиёд уй фойдаланишга берилди, 3000га яқин мактаб ва соғликни сақлаш муассасаси қад ростлади.
Ишлаб чиқарилган ички маҳсулот ҳажми 1993 йилги 29,4 млрд. тенгедан ўтган йили 47 трлн. тенгега етди. Мана шу муваффақиятлар натижасида дунё ҳамжамияти Қозоғистонни бозор иқтисодиётидаги давлат сифатида тан олди. Мазкур байрам нафақат бугунги кунда шижоат билан меҳнат қилаётганларнинг балки, меҳнатнинг роҳатини кўраётган 2,5 миллиондан зиёд меҳнат фахрийларининг ҳам байрами, – деди вазир.
“Оммавий меҳнат жамияти сари” ғоясини жонлантириш учун 2016 йили вазирлик меҳнат шажараси ва ишлаб чиқариш меҳнаткашлари орасида ўтказиладиган “Меҳнат йўли” республика танловини эълон қилган эди.
Тантанали тадбирда танлов доирасидаги “Илғор меҳнаткашлар сулоласи” бўлиб Ақтўбе вилоятида темирйўл соҳасида 423 йил меҳнат фаолиятига эга Жубанишевлар авлоди саналса, “Ёш авлодни меҳнатга жалб этгани учун” махсус унвонини Қозоғистоннинг Меҳнат Қаҳрамони Иван Сауэр Ғарбий Қозоғистон ҳудудининг электр мутахассиси Тилек Харинга топширди. “Ишлаб чиқаришдаги энг ёш илғор ходим” унвони Шимкент шаҳридаги 9-умумий ўрта мактабнинг тарих ўқитувчиси Нурсултан Аббасовга насиб этди. “Ишчи ёшларнинг устоз-мураббийи” унвони Сўзоқ туманидаги “Қайрат” болалар боғчасининг мудираси Нуржамал Тўлеуовага насиб этди.
Шунингдек, байрам тантанасида Меҳнат куни арафасида ижтимоий суғурта тизимининг илғор ходимлари ҳам эътибордан четда қолмади. Улар “Нафақа тизимининг илғор ходимлари”, “Ижтимоий суғурта тизимининг илғор ходимлари”, “Илғор ижтимоий ходим”, “Тиббий-ижтимоий ташкилотнинг илғор ходими”, “Илғор нодавлат ташкилот”, “Меҳнат билан таъминлаш марказининг илғор ходими”, “Ижтимоий соҳанинг илғор ташкилотчи-менежери”, “Тиббий-ижтимоий таҳлил соҳасининг илғор ходими” ва “Илғор давлат меҳнат нозири” номинацияларининг ғолиблари тақдирланди.
Ижтимоий муҳофазалаш соҳаси ходимлари куни Давлат раҳбарининг 2011 йил 20 октябрдаги Фармойиши билан тасдиқланган. Бу – Элбошининг нафақадорларга, имконияти чекланган одамларга, кўп болали, кам таъминланган оилаларга ғамхўрлигининг белгисидир.
Мамлакатимизнинг барча минтақаларидан 700дан зиёд одам қатнашган республика анжуманида меҳнатни улуғловчи қўшиқлар тантанага ўзгача файз киритди.