ДАВЛАТ РАҲБАРИ ҚОЗОҒИСТОНГА РАСМИЙ ТАШРИФ БИЛАН КЕЛГАН ИОРДАНИЯ ҚИРОЛИ АБДУЛЛА II НИ ҚАБУЛ ҚИЛДИ. 

Учрашувда Элбоши мамлакатлар ўртасидаги икки томонлама муносабатлар тобора кенгайиб бораётганини таъкидлади.

– Ўзаро дипломатик алоқаларимиз ўрнатилишининг чорак асри арафасида келдингиз, – деди Н. Назарбаев. – Бу давр мобайнида  ўзаро ишонч ва дўстликка асосланган ҳамкорликни йўлга қўйдик. Халқаро ташкилотлар фаолияти доирасида бир-биримизга ёрдам кўрсатмоқдамиз. Иордания Қозоғистоннинг ташаббусларини жаҳон саҳнида қўллаб-қувватламоқда. 

Нурсултан Назарбаев иқтисодиётнинг қишлоқ хўжалиги, фармацевтика, мудофаа саноати каби соҳаларидаги ўзаро ҳамкорликнинг ортиб бораётганини таъкидлади. 

Давлат раҳбари Иордания ва шахсан қирол Абдулла II нинг Яқин Шарқда тинчлик ва хавфсизлик ўрнатилиши йўлида амалга оширган ишларини алоҳида кўрсатиб ўтди ҳамда “Ядро қуролисиз олам ва дунёвий хавфсизлик учун” халқаро мукофотини топширди. 

– Сиз халқларни яқинлаштирувчи тинчликпарварлик тадбирларини амалга оширмоқдасиз. Мамлакатингиз Астана жараёнида фаол қатнашмоқда. Иордания 1 миллиондан ортиқ суриялик қочоқларга бошпана берди. Сурияга инсонпарварлик ёрдами юбормоқдасиз. Бутун жаҳон ушбу хизматларингизни тан олиши керак, – деди Давлат раҳбари. 

Қирол Абдулла II ўз навбатида Қозоғистон Президентига таклиф ва мукофот учун миннатдорчилик билдирди. Ҳамда халқаро зиддиятларни бартараф этишда Нурсултан Назарбаевнинг хизматларини тилга олди. 

– Жаҳоннинг мукаммалроқ ва хавфсизроқ бўлишидаги хизматларингизни жуда яхши биламиз ва қадрлаймиз. Сизнинг пешқадамлигингиз ҳамма учун муҳим, – деди Абдулла II.