Вилоят маркази Шимкент шаҳрида 9 кун давом этган боксдан эркаклар ўртасидаги республикааро биринчилик поёнига етди.

Финал учрашувини минтақа раҳбари Жансейит Туймебаев очиб берди ва спортчиларга муваффақият тилади.

– Ушбу мусобақада 200дан зиёд спортчи иштирок этмоқда. Барчаси Қозоғистоннинг ҳар бир минтақасидаги энг кучли боксчилар. Курашда чидам ва куч-ғайрат, маҳорат ва абжирлик каби хусусиятлар зарур. Маънавий жиҳатдан соғлом бўлган инсонгина ғалабага эришади. Бугунги финалда иштирок этаётган спортчиларимиз ана шунга лойиқ деб ўйлайман. Шунинг учун ушбу тадбирни ташкил этишда қўллаб-қувватлаган ҚР бокс федерациясининг раҳбарига миннатдорчилик билдираман, деди – Жансейит Қансейитули. 

49 кг. вазнда Ақмўла вилоятидан келган Темиртас Жусипов ғолибликни қўлга киритган бўлса, 52 кг. вазн тоифасида вилоятимиз боксчиси Ўлжас Байниязов яхши натижа кўрсатди. Шунингдек, 56 кг. вазнда пойтахтлик Илияс Сулейменов, 60 кг. вазнда манғистовлик Берик Абдирахманов ғолиб бўлишди. Оғир вазндаги қизиқарли учрашув ҳам спортсевар жамоанинг қизиқишини орттирди. 75 кг. вазнда курашга тушган жануб спортчиси Абай Тўлеш ғалабани қўлдан бермади. Олимпиада ўйинларининг кумуш медаль соҳиби манғистовлик Адилбек Ниязимбетовга 81 кг. вазнда тенг келадиган рақиб бўлмади. 91 кг. вазнда қўстанайлик Антон Пинчук чемпионликни қўлга киритган бўлса, ўта оғир вазнда жамбиллик Нурсултан Аманжолов чемпион бўлди. Умумий ҳисобда Жанубий Қозоғистон вилояти 1-ўринни эгаллади. 

Республика чемпионати “Qazsport” телеканали орқали тўғридан-тўғри эфирга берилди.