Астанадаги Тинчлик ва тотувлик саройида ўтган Қозоғистон халқи Ассамблеясининг “Барқарорлик, бирлик, тотувлик – янгиланиш гарови” масаласини кун тартибига қўйган XXV сессияси йиғилишида Давлат раҳбари, Қозоғистон халқи Ассамблеясининг Раиси Н. Назарбаев нутқ сўзлади.

 Элбоши дунёдаги мураккаб вазиятда эл тотувлиги барқарор ривожланишнинг асосий шарти эканлигини яна бир марта таъкидлаб, қийин кунларда бирлигимизнинг гарови, манбаи сифатида тузилган Ассамблеямиз ўзига юкланган муқаддас вазифани ўта самарали адо этаётганини тилга олди.

Шунингдек, Давлат раҳбари замонавий тараққиёт босқичидаги бурч ва вазифаларимизни, юртимизни жаҳоннинг энг илғор 30 мамлакати қаторига олиб кириш йўлидаги имкониятлар ва қийинчиликларни, бу борадаги вазифалар ўзининг "Келажакка йўлланма: маънавий янгиланиш" мақоласида баён этилганини айтди. 

Дарҳақиқат, инсоният тарихи, аслида, сабоқлардан иборат. Шулардан бири: ҳар бир халқ ёки элат ўз тарихини, ота-боболари босиб ўтган йўлни, урф-одатларини, ўзигагина хос бўлган қадриятларини, тили, дини ва ҳатто, олис аждодларини унутмаслиги лозим. Бунга амал қилмаганлар халқ сифатида тарих саҳнасидан тушиб қолганлигига мисоллар кўп. Сессияда қабул қилинган Мурожаатда эса, янги шароитда янгиланишга бўлган ички интилиш – тараққиётимизнинг энг асосий қоидаси экани қайд этилади. 

Элбоши маърузасининг сўнгида барча қозоғистонликларни кириб келаётган Қозоғистон халқининг бирлиги байрами билан табриклаб, ҳаммага тинчлик, фаровонлик, бахт-саодат тилади. Фурсатдан фойдаланиб, мен ҳам барча ҳамюртларимни ушбу, 1996 йилдан бери нишонланиб келинаётган қутлуғ кун билан чин қалбимдан табриклайман.