Мақтаарал туманида грециялик сармоядор соатига 200 тонна асфальт-бетон ишлаб чиқарадиган завод қурмоқчи. Тумандаги индустриявий минтақада бунёд этиладиган заводнинг лойиҳавий қиймати 1 миллион АҚШ долларини ташкил қилади.

армоядори Грециянинг “NIOVI S.A” компа­ниясига муассислик қилаётган “Soldatos” МЧБ бош директори А. Шинтаевни вилоят ҳокими Ж. Туймебаев қабул қилиб, келгусида амалга оширадиган ишларида омад тилади. 

Бугунги кунда давлат томонидан сармоядор­ларга қулай шароитлар яратилганини, ви­ло­я­тимиз иқтисодий жиҳатдан барқарор ри­вожланаётганини айтган минтақа раҳбари, жумладан шундай деди:

– Минтақамиз Марказий Осиё, Яқин Шарқ ва Европа мамлакатларини туташтирадиган йўллар чорраҳасида жойлашгани учун чега­равий савдо-сотиқ, экспорт ривожланмоқда. Вилоятимизда 11та индустриявий минтақа, енгил саноат йўналишида битта иқтисодий минтақа мавжуд. Сармоя жалб этиш ва инвесторлар­га “ягона дарча” қоидаси асосида хизмат кўрсатиш билан шуғулланадиган минтақавий ривожлантириш институтлари фаолият юритмоқда. Улар ишбилармонларга маслаҳатлар бериб, молиявий ва инфратузилма ишларида ёрдам беради, – деди вилоят ҳокими.

Компания раҳбари шу кунгача туманда ас­фальт заводини ишга тушириб, Қизилқум овул округида жойлашган йўлларга асфальт ет­казиб бераётганини айтди. У ишларнинг ик­кинчи босқичини келаси йилнинг ёз ойларида тугаллашни режалаштираётганини маълум қилди.

 “Soldatos” МЧБ сармоядорлари Мақтаарал­даги лойиҳадан ташқари Сариоғочда соатига 150 тонна, Туркистон шаҳрида эса соатига 200 тонна асфальт-бетон ишлаб чиқарадиган завод қуришни кўзлашмоқда.

Айтиш жоизки, туманда ташқи сармоядан ташқари, ички сармоя ҳисобидан қайта ишлаш заводи, гигиена буюмлари ва полиэтилен завод­ларининг лойиҳалари татбиқ этилади. 38 гектар ерда жойлашган индустриявий минтақада иш юритаётган “Береке” пахта заводидан ташқари, бу ерда келаси йили яна 4та лойиҳа амалга оширилади.