Жеткундодан Осиё федерацияси президенти, VIII ДАН ва қора белбоғ соҳиби Мурод Умаров ва унинг шогирдлари ҳақида газетамиз саҳифаларида кўплаб мақолалар ёзганмиз. Манкентлик Жаҳон ва Осиё чемпиони Ал Бухорий Ирисметов ҳақида бир неча мақола ёзганимиздан ҳам муштарийларимизнинг хабари бор. 

17-19 ноябрь кунлари Тошкент шаҳрида ўтган “Амир Темур кубоги” халқаро мусобақасида М. Умаровнинг яна бир иқтидорли шогирди Асет Анарбаев 63 килограмм вазнда олтин медалга сазовор бўлибди.

Тошкент вилоятининг Тўйтепа шаҳрида туғилган Асет 8 йил муқаддам  мамлакатимизга кўчиб келган. Шундан буён унга Мурод Умаров мураббийлик қилиб келмоқда.

– Жеткундо спорт турини машҳур шарқ яккакураш устаси Брюс Ли кашф этган. Жеткундо сўзининг асл маъноси – “Илгарилаган мушт йўли”. Бугунги кунда Алматида 18та, Қизилўрдада 7та, Шимкентда эса 4та мактаб фаолият юритмоқда. Асетнинг ёшлигида дзюдо билан шуғуллангани ҳозир жуда қўл келмоқда. У ўтган ойда Бишкекда ўтган мусобақада ҳам барча рақибларидан устун келиб, олтин медалга сазовор бўлганди, – деди М. Умаров.

Осиё федерацияси президенти Мурод ака ҳозирги кунгача шогирдларига жеткундо сирларини ўргатиб келмоқда. Эндиги мақсад – 2018 йилнинг март ойида Бангокда ўтадиган жаҳон чемпионатига Асет Анарбаевни муносиб тайёрлаш. 

– Жеткундо тури дунё бўйлаб тез суръатда ривожланмоқда. Биргина Американинг ўзида 20 миллион одам айнан шу спорт тури билан шуғулланади. Хитойда эса 30 миллион. Қозоғистондаги шогирдларимнинг сони 4 минг нафарга етди, – дейди М. Умаров.

Шогирдининг жаҳон чемпионатида муваффақиятли иштирок этишига ишонаётган Мурод Умаров сахий, қўли очиқ ҳамюртларимизни ҳамкорликка, ёш спорт юлдузини қўллаб-қувватлашга чақиради.