Соғлом турмуш тарзини қарор топтириш, қолаверса, оммавий спортни кенг тарғиб қилиш мақсадида Сайрам туманида янги спорт иншоотлари қурилмоқда. Яқинда Қорасув қишлоқ округининг Ақбастау овулида Сайрам туманида янги спорт мажмуаси фойдаланишга топширилди. 

Юнон-рим кураши бўйича спорт устаси, Қозоғистон чемпиони Масатбек Айбаров номидаги мазкур спорт саройининг тантанали очилиш маросимида туман ҳокими Бақтияр Мамаев иштирок этиб, сўзга чиқди.

– Элбошимизнинг халқимизни оммавий спортга жалб қилиш хусусидаги кўрсатмасига мувофиқ бугун овул ёшларининг жисмоний тарбия ва спорт билан мунтазам шуғулланишлари учун мана шундай мажмуа барпо этилди. Ўғил-қизларимизнинг соғлом ва бақувват бўлиб ўсишларида барча қулайликларга эга, замонавий спорт мажмуаларининг ўрни беқиёсдир. Ўйлайманки, келажакда ёшлар орасидан Ватанимизнинг мовий байроғини баланд ҳилпиратадиган моҳир спортчилар етишиб чиқади, – деди  Б. Мамаев.

 Янги мажмуада 1-сонли болалар ва ўсмирлар спорт мактабининг очиқ биринчилиги ўтди. Турнир ғолиблари ва совриндорларга маҳаллий ҳокимлик ҳамда ҳомийларнинг қимматбаҳо совға-саломлари топширилди.