Душанба куни вилоят ҳокими Ж. Туймебаев селектор кенгашини ўтказди, унда бугунги куннинг энг долзарб учта масаласи ҳақида гап борди.
Биринчиси – ижтимоий муҳим озиқ-овқат маҳсулотлари, ёнилғи-мойлаш материаллари баҳоларини барқарорлаштириш, қишлоқ хўжалик маҳсулотларини сақлаш шароитлари ва барқарорлаштириш жамғармасининг ҳозирги вазиятда ишлаши.
Иккинчиси – давлат хизматларини кўрсатиш сифати.
Учинчиси – давлат муассасаларидаги ахборот хавфсизлиги.
Минтақа раҳбари ЖҚВда ишлаб чиқарилаётган ва экспорт қилинаётган озиқ-овқат товарларининг экспертизасини ўтказишни топширди.
– Бунинг учун мазкур масалалар бўйича махсус режа ишлаб чиқилиши, озиқ-овқат маҳсулотларининг баҳолари таҳлил қилиниши керак. Товарлар ишлаб чиқариш ва сақлаш масалаларига эътибор қаратиш лозим. Сайрам туманидаги 40 минг тонна сиғимли омбор биноларидан самарали фойдаланишни топшираман. Вилоятдаги барча бошқармалар, шаҳар ва туманлар ҳокимликлари ана шу масалаларни ҳал этишлари зарур, – деди Ж. Туймебаев.
Кенгашда тадбиркорлик, индустриявий-инновациявий ривожланиш ва туризм бошқармасининг раҳбари Б. Қурмансейит, вилоят ҳокими девони раҳбарининг ўринбосари Қ. Тўлендиев, вилоят ҳокими девони ахборот хавфсизлигини мониторинг қилиш, ахборотлаштириш ва давлат хизматлари кўрсатиш сифатини назорат қилиш бўлимининг раҳбари Е. Ўтебаевлар маъруза қилдилар.
– Минтақада вазият барқарор, товарлар тақчиллиги кузатилмаяпти. Октябрь ойида ижтимоий аҳамиятга эга озиқ-овқат товарларидан иккитасининггина нархи ошди. Картошканинг бир килограмми 100 тенгедан 117 тенгега, яъни 17 фоизга, сузманики 9,4 фоизга ўсди. Карамники эса 6,8 фоизга пасайди, – деди Б. Қурмансейит.
Баҳоларнинг ўсишига нималар таъсир этаётгани таҳлил қилинди. Сабаблар яққол кўзга ташланади: йил бошидан бери АИ-92 русумли бензиннинг баҳоси 22,1 фоизга, дизель ёнилғисиники 19,8 фоизга кўтарилди. Коммунал хизматлар ҳақи, шу жумладан: иссиқликники – 12,2, канализацияники – 13,3, сувники ҳам шунча, электр қувватиники – 1,3 фоизга ўсган.
Вилоят ҳокими октябрь ойида минтақада инфляция даражаси 6,1 фоизни ташкил этганини, шунингдек, озиқ-овқат товарлари баҳоси 4,3 фоизга, ноозиқ-овқат товарлариники – 8,6 фоизга, пулли хизматларники – 5,8 фоизга ўсгани қайд қилинганини етказди.
Ж. Туймебаев ҳамма туманларда ижтимоий дўконлар очишни топширди.
Ўтрор туманидан тадбиркор Е. Пазилбеков ўз бозорида кундалик эҳтиёж товарларини бозордагидан 15-20 фоиз арзон сотмоқда.
Ижтимоий аҳамиятга эга маҳсулотларнинг нархини бир қолипда ушлаб туриш учун 16 ноябрда барқарорлаштириш жамғармасидаги захиралар очилди.
Натижада баҳоларни: пиёзникини – 19,3, сабзиникини – 12,7, картошканикини – 11,1, карамникини – 5,8, қандникини – 4,4 фоизга пасайтиришга муваффақ бўлинди. Шу сабабли ноябрь ойи бошларига келиб, баҳолар индекси 98,5 фоизни ташкил этди. У режалаштирилган кўрсаткичдан 1,5 фоиз пастдир.
Баҳоларни барқарорлаштириш мақсадида ЖҚВда вилоят штаби тузилди. Вилоятдаги савдо корхоналарининг раҳбарлари билан ижтимоий аҳамиятга эга маҳсулотларнинг баҳоларини ушлаб туриш ҳақида шартномалар имзоланди. Бундан ташқари ижтимоий қишлоқ хўжалик ярмаркалари ўтказилмоқда. Йил бошидан бери 102та шундай ярмарка уюштирилиб, уларда жами қиймати 1 млрд. 825,8 млн. тенгелик 6129,6 тонна маҳсулот сотилди.
– Шимкентда йил охиригача 20та ижтимоий дўкон пайдо бўлади. Бугунги кунгача иккитаси очилди. Ҳожимуқон номидаги стадионга яқин майдонда катта ижтимоий бозор ишлай бошлайди, – деб хабар қилди Шимкент шаҳри ҳокими Н. Сауранбаев.
– Шимкентда, Туркистонда, Кентовда, шунингдек, Сариоғоч ва Мақтаарал туманларида ижтимоий савдо нуқталарини очишни топшираман. Девон раҳбари ушбу масалани қатъий назорат остига олсин, – деди Ж. Туймебаев.
Вилоят ҳокими девони раҳбарининг ўринбосари Қ. Тўлендиевнинг сўзларига кўра, айни пайтда маҳаллий ижро органлари томонидан 192 турдаги давлат хизматлари кўрсатилмоқда. Шу йилнинг ўзида 16 млн. 424 минг 918 хизмат кўрсатилган.
– Ўтган 10 ой ичида 7 млн. 027 минг 180 хизмат электрон шаклда кўрсатилган. Бу барча хизматларнинг 42,8 фоизини ташкил этади. Соғликни сақлаш соҳасидаги хизматларнинг 80 фоизи электрон шаклда кўрсатилмоқда, – деди Қ. Тўлендиев.
10 ой натижаларига кўра аҳолига хизмат кўрсатиш марказлари томонидан 541 816 электрон имзо берилган. Бунда электрон хизматларнинг улуши камроқ, чунки давлат органлари томонидан тушунтириш ишлари етарли даражада олиб борилмаяпти. Масалан, “Даму” дастурини амалга ошириш бўйича электрон хизматлар кўрсатиш натижалари кўнгилни хижил қилади. Чунончи, Байдибек, Қазиғурт, Сўзоқ, Сайрам ва Чордара туманларида улар ўта паст.
– Давлат хизматчисининг ишидаги энг муҳим жиҳат аҳолига тўғри хизмат кўрсатиш, – деди Ж. Туймебаев. – Биз бу ишни сифатли ва қисқа муддатда бажаришга ҳаракат қилишимиз керак. Туманларнинг раҳбарлари ушбу йўналишдаги ишни кучайтиришлари лозим, чунки бу улар фаолиятининг самарадорлиги кўрсаткичларига киради. Шунингдек, олис овулларда “Қазпочта” бўлимлари орқали хизмат кўрсатишни жорий қилишни топшираман.
Селектор кенгашини якунлар экан, минтақа раҳбари туман ва шаҳар ҳокимларига муҳокама этилган масалалардан хулоса чиқариб олишни ва имкон қадар тезлик билан ижобий натижаларга эришишни топширди.
Ижтимоий-тадбиркорлик корпорацияси томонидан барқарорлаштириш жамғармасига шартнома асосида 815, 8 млн. тенгелик 6500 тонна товарлар харид қилинди.
Шу жумладан 210 млн. тенгега 1000 тонна қанд, 247,5 млн. тенгега 3000 тонна картошка, 41,5 млн. тенгега 1000 тонна пиёз, 70,4 млн. тенгега 1200 тонна сабзи, 12,2 млн. тенгега 70 тонна гуруч, 266 млн. тенгега 200 тонна мол гўшти, 4,2 млн. тенгега 30 тонна макарон сотиб олинди.
Бундан ташқари 2500 тонна ун ва 244 тонна қанд (ўтган йилдан қолган) захирада турибди.
2017 йил ноябрь ойи учун вилоят бўйича баҳолар мониторинги
Ижтимоий аҳамиятга 17.11.17гача 24.11.17гача +,– %
эга озиқ-овқат товарлари (тенге) (тенге)
Гуруч 226 226 0 100,0
1 навли буғдой уни 116 116 0 100,0
Гречка ёрмаси 244 244 0 100,0
1 навли ундан ёпилган нон 100 100 0 100,0
Макарон 161 161 0 100,0
Суякли гўшт 1473 1473 0 100,0
Товуқ 666 666 0 100,0
2,5 фоиз ёғли сут 181 181 0 100,0
2,5 фоиз ёғли қатиқ 205 205 0 100,0
5,9 фоиз ёғли сузма 1541 1541 0 100,0
Тухум 257 257 0 100,0
Сариёғ 1943 1943 0 100,0
Писта ёғи 393 393 0 100,0
Карам 65 65 0 100,0
Пиёз 71 71 0 100,0
Сабзи 103 103 0 100,0
Картошка 104 104 0 100,0
Қанд (шакар) 197 197 0 100,0
Туз 52 52 0 100,0