Шимкент шаҳрида таъмирдан ўтган “Металлург” истироҳат боғи фойда­­ланишга топширилди. 

1 декабрь – Тўнғич Президент куни муносабати билан уюштирилган тантанали тадбирда вилояти ҳокими Ж. Туймебаев билан шаҳар ҳокими Нурлан Сауранбаев иштирок этди. 

Вилоят ҳокими фуқаролар ва меҳмонларни байрам билан табриклар экан, қайта таъмир­ланган истироҳат боғи 60 йиллик тарихга эга эканини айтиб ўтди.

– Давлат раҳбари минтақамизга ташриф­лари чоғида доимо шаҳримизнинг ривож­ланишига алоҳида эътибор қаратиб, унинг ёрқин келажагига зўр ишонч билдириб ке­лади. Уни оқлаш мақсадида кенг қамровли ишлар амалга оширилиб, шаҳримизнинг яшнаши учун янги лойиҳалар яратилмоқда. “Металлург” атамасининг Элбошимиз номи билан боғлиқлигини ўзгача фахр билан тилга оламиз. Сабаби, барчамизга маълум, Элбоши Нурсултан Абишули ҳам дастлаб меҳнат йўлини оддий металлургликдан бошлаган,– деди минтақа раҳбари.

Тадбирда Элбошининг курсдоши Аманали Абдрахманов ҳам сўзга чиқиб, аҳоли номидан миннатдорчилик билдирди. 

Шу ўринда, “Металлург” истироҳат боғи пойдевори 1957 йили қаланган. Қайта таъмирдан сўнг унинг майдони 3,6дан 5 гек­тарга кенгайтирилди. Ҳордиқ масканига ёритиш ускуналари, ахлат қутичалари ҳамда келувчиларга қувонч бағишлаш ниятида фаввора ҳам ўрнатилди.