Жанубий Қозоғистон вилоятида кўкламги сув тошқинининг олдини олиш ишлари режа бўйича олиб борилмоқда. 

Туман, шаҳар ҳокимликлари ва вилоят фавқулодда вазиятлар департаменти биргаликда Сариоғоч ва Мақтаарал туманларида, Сирдарёда хавф даражасини аниқлаш мақсадида таҳлил юритиб, Чордара туманининг Суткент овулида 800 метр майдон ва дарё қирғоғига қум тўлдирилган 7000га яқин қоп ётқизди, бу ишга 20 техника ва 210 одам сафарбар этилди.

Бугунги кунда қирғоқларни мустаҳкамлаш ишлари Ўтрор, Сариоғоч, Чордара туманлари ва Туркистон, Арис шаҳарларида ҳам жадаллаштирилди. Чунончи, қайд этилган жойларда қум тўлдирилган 300 минг қоп ташланиб, 467 киши, 60та махсус техника ва 10та сузиш қуроли тайёрлаб қўйилди. Маҳаллий ижро органларининг бу тадбирлари Сирдарё ўзанидаги 1500дан 2000 кубметр секундгача ҳажмдаги сувни жиловлаш имконини беради. Шунингдек, тошқиннинг олдини олиш борасида Ўтрор туманида бажарилаётган ишлар билан ОАВ вакиллари танишиб қайтишди.

Фавқулодда вазиятлар департаментининг мутахассислари “Қазгидромет” РДК марказидан кундаликда маълумотлар олиб, вилоят ҳудудидаги кўкламги сув тошқинига мониторинг, тахминлаш ишларини тўхтовсиз бажармоқдалар.