Тўлебийлик фермерлар паррандачиликни ривожлантиришга бел боғлашди
Вилоят ҳокими Жансейит Туймебаев Тўлебий туманига хизмат сафари давомида давлат дастурлари ижроси билан танишди. Элбошининг қишлоқ хўжалик кооперациясини ривожлантириш борасидаги топшириқлари асосида вилоятнинг барча туманларида ихтисослаштирилган семинарлар ўтказилиб, Тўлебий туманида паррандачиликни ривожлантиришга бел боғлаган 24 тадбиркор «Леңгір құс» қишлоқ хўжалик ширкатини тузгани ва давлатдан имтиёзли кредит олиб, иш бошлагани, минтақа раҳбарининг Киелитас қишлоғида «Леңгір құс» фермасининг пойдеворига капсула солиб, паррандачиликнинг ривожига муваффақият тилагани ҳақида ёзган эдик.
Масалани ўз назоратига олган вилоят раҳбари ферма фаолияти билан танишди.
Таъкидлаш жоизки, паррандачилик фермасини очиш учун керакли ускуналарни харид қилишга сарфланадиган маблағнинг 50 фоизи давлат томонидан субсидияланади. Шунингдек, сотиб олинадиган зотдор жўжаларнинг ҳар бирига 400 тенгедан ёрдам пули берилади. Бундан ташқари, хўжаликлар етиштирилган парранда гўштининг ҳар килосига 40 тенгедан ёрдам пули оладилар.
Ушбу паррандачилик фермасининг асосчиси – чорак асрлик тарихга эга «Шымкент құс» МЧБнинг бирлашган корхонаси. Ҳозир бу фермада 600 минг парранда боқилмоқда. Товуқ фермаси йилига 14 млн. дона тухум етиштиради. Маҳсулот жануб минтақасидан ташқари, қўшни вилоятларга ҳам юборилмоқда.
Бугунги кунда вилоятимизда 2 млн. 401 мингта парранда ўстирилмоқда. Уларнинг 50 фоизи ёрдамчи хўжаликлар улушида. Жануб минтақаси ўзини ўзи парранда гўшти билан 74,3 фоиз, тухум билан 75 фоиз таъминлаш имкониятига эга.
Сафар давомида минтақа раҳбари Ленгер шаҳридаги «Янгуан» МЧБнинг жиҳоз цехи фаолияти билан ҳам танишди. Ўтган йили очилган корхонага 100 млн. тенге сармоя жалб этилди. Ойига 500 дона турли мебель ва 6000дан зиёд ўриндиқ ишлаб чиқарадиган корхонада 50 одам ишлайди. Уларни ясаш учун ёғоч республикамизнинг шимолий вилоятларидан келтирилмоқда.
Аққум қишлоқ округидаги қорамол етиштириш билан шуғулланадиган «Тумар» қишлоқ хўжалик ширкатига келган вилоят раҳбари жамоа билан суҳбатлашди. 106 млн. тенге насия олган хўжалик экспортга йилига 75 минг тонна гўшт жўнатмоқда. Бу ерда 25 одам доимий иш билан таъминланган. 100 бош қорамол бўрдоқиланаётган хўжаликнинг мол сўйиш майдончаси ҳам бор. Хўжалик «КазАгроҚаржы» ҲЖдан олган 53 млн. тенге насияни мол бўрдоқилаш майдончаси қурилишига сарфлаган. «Тумар» ўтган йили етиштирилган қорамол гўштига 75,4 млн. тенге субсидия олган (гўштнинг ҳар килосига 170 тенгедан).
– Жамиятнинг экологик жиҳатдан тоза маҳсулотларга талаби ўсиб бормоқда, – деди вилоят ҳокими. – Аммо у ҳозиргача тўлиқ қондирилгани йўқ. Муаммони ҳал этиш учун бир қанча ташкилий, иқтисодий, ижтимоий тадбирларни амалга ошириш, шу жумладан, чорвачиликда иқтисодий ислоҳотларни янада чуқурлаштириш керак
Бебаҳо мерос, бетакрор табиат, қулай инфратузилма туризм ривожида муҳим аҳамият касб этаётган туманда минтақа раҳбари муқаддас қадамжолардан бири – «Ғайып ерен Қырық Шiлтен»га ҳам бориб, шу номли хайрия жамғармаси амалга ошираётган ишлар билан танишди. Жамғарма раиси Мухтар Нахипбеков бу ерга йилига 2500 сайёҳ келаётгани ва 100 ўринли меҳмонхона қурилиши бошланганини айтди.
– Сайёҳлик ҳар бир мамлакат иқтисодиётини юксалтириш, қўшимча иш ўринлари яратиш ҳамда халқаро алоқаларни мустаҳкамлашнинг муҳим йўналишларидан биридир, – деди минтақа раҳбари. – Шу боис, дунё бўйича ушбу соҳанинг мазмун-моҳияти, аҳамиятини фаол тарғиб қилиш, жамоатчиликка атрофлича тушунтириш, бу борада давлатлараро дўстона муносабатларни изчил ривожлантириш тақозо этилади. Сизлар вилоятнинг сайёҳлик салоҳиятини оширишга салмоқли ҳисса қўшмоқдасизлар.
Тўлебий туманига сафари натижаларига якун ясаган Ж. Туймебаев барча имконият ва бор салоҳият ҳудуд иқтисодиётини ривожлантириш ва шу орқали ижтимоий масалаларни ҳал этишга қаратилаётганидан мамнунлигини яширмади. Замонавий корхоналарни барпо этиш, кичик бизнес ва тадбиркорликни бугунги талаблар асосида ривожлантириш мақсадида улкан ишлар амалга оширилаётганини қайд этиб, бу борада туманда бажарилган ишларга баҳо берди. Шунингдек, у туманда давлат дастурларида белгиланган вазифаларнинг ижроси ҳамда иқтисодий ислоҳотларни жадал давом эттириш бўйича Президентимиз ва Ҳукумат томонидан белгилаб берилган устувор вазифаларнинг қандай бажарилаётганига эътибор қаратди.
– Энг муҳими, кўрилаётган чоралар ижобий натижасини бермоқда, – деди Ж. Туймебаев. – Жорий йилнинг ўтган даври мобайнидаги макроиқтисодий кўрсаткичлар шуни исботлайди.
Мустақилликнинг 25 йили мобайнида туманда кўп қаватли уйлар қурилиб, 480 одамга бошпана берилган эмасди. Буларнинг барчаси фидокорона меҳнат маҳсулидир. Зеро, эришилган ютуқлар натижасида аҳоли фаровонлиги ошиб, турмуш даражаси янада юксалмоқда, ҳудуд, ҳар бир туман, қишлоқ ва хонадон обод бўлиб бормоқда.