Қазиғурт туманидаги “Қайип ата” масъулияти чекланган биродарлиги Эрон Ислом республикасига жорий йил 6 минг бош қўй гўштини экспорт қилди. Биродарлик йил охиригача экспорт ҳажмини яна орттириш ниятида. 

Йилига 2 млн. 400 минг тоннага яқин қўй гўшти истеъмол қиладиган Эрон Ислом Республикаси бозорига гўшт жўнатиш Қозоғистон учун гўшт экспортини оширишга яхши имконият. Бундан “Қайип ата” МЧБ самарали фойдаланмоқда. Шаҳар четида жойлашган биродарликнинг мол сўйиш бекатида бир кеча-кундузда 1000 бошга яқин майда мол сўйилиб, қадоқланмоқда. Халқаро талабларга мувофиқ бунёд этилган мажмуада барча шароитлар муҳайё. Бу ердаги омбор, музлатгичлар маҳсулот сифатининг бузилмаслигига имкон беради.

Шунингдек, “Қайип ата” МЧБнинг Қазиғурт туманида мол бўрдоқилаш мажмуаси бор. Етиштирилган гўштнинг экологик тозалиги унга бўлган талабни кучайтирмоқда. Шу сабаб, биродарлик гўшт етиштиришдан ташқари уни ҳорижга экспорт қилишни ҳам йўлга қўйган. Масалан,

йил бошидан буён “Қайип ата” Эронга 6 минг бош қўй гўшти, Ўзбекистонга 300 бош қорамол ва 32 бош йилқи экспорт қилди. Бундан ташқари, биродарликнинг ўз бозорларимизда 393 тонна мол гўшти сотилган.