Ўзбекистон Президенти Шавкат Мирзиёев амалий ташрифи давомида Жанубий Қозоғистон вилоятида Қозоғистон раҳбари Нурсултан Назарбаев билан учрашди.

Унда Ўзбекистон раҳбарининг Қозоғистонга март ойидаги ташрифи чоғида икки мамлакат ўртасида эришилган битимларни амалга ошириш масалалари муҳокама этилди.

Қозоғистон Президентининг таъкидлашича, аввалги учрашувдан сўнг икки мамлакат ўртасида тадбиркорлик соҳасида жўшқинлик кузатилмоқда.

– Жорий йилнинг биринчи чорагида иқтисодиётнинг турли соҳаларида ўзаро муносабатлар даражаси ошгани сезилмоқда. Транспорт-логистика соҳаси, автосаноат, шунингдек кенг кўламли масалалар бўйича минтақавий ҳамкорликни алоҳида таъкидлаб ўтиш жоиз. 2017 йилнинг илк уч ойи давомида товар айирбошлаш ҳажми 37 фоизга ўсди, – деди Нурсултан Назарбаев.

Ўз навбатида, Шавкат Мирзиёев икки томонлама учрашувларнинг кўпайиши давлатлараро муносабатлар самарасига тўғридан-тўғри таъсир этишига эътибор қаратди.

– Менинг март ойидаги ташрифимдан сўнг биз қўшма фаолиятнинг барча йўналишлари бўйича Йўл хариталарини қабул қилдик. Вазирлар, ҳокимлар даражасидаги учрашувлар кўпайди, – деб таъкидлаб ўтди Ўзбекистон раҳбари.

Учрашув якунида икки давлат раҳбарлари Қозоғистон – Ўзбекистон ҳамкорлигининг ижобий жўшқинлиги сақланиши ва янада ривожланишига ишонч билдиришди.