«Хабар» телеканали Туркистондаги Ўткир Қудратов раҳбарлик қилаётган «Тошоноқ» ўрта мактаби ўқувчиларининг республика беллашувидаги ғалабаси ҳақида хабар тарқатди. Бу хушхабарни эшитиб, доимий обуначимизга айланган мактабга йўл олдим. 

Мактаб директори Ў. Қудратовнинг иш кабинетида республика миқёсидаги беллашув тафсилотини қоғозга туширдим. «Тил – давлат мустақиллигининг рамзи» деб номланган танловда иштирок этган 1500 ўқувчидан Астанага 107 нафар истеъдодли ўқувчи танлаб олинибди, улар орасида Туркистон шаҳри шаънини “Тошоноқ” мактабининг Рухсора Қудратова раҳбарлигидаги ўқувчилари муносиб ҳимоя қилишибди. Севара Мамадалиева иккинчи, Бобомурод Бахтиёр, Абдувосит Қидирбой, Эъзоза Бахтиёрлар учинчи фахрли ўринларга сазовор бўлишган. Давлат тилини мукаммал ўзлаштирган бу ўқувчилар ҚР Таълим ва фан вазирлиги қошидаги «Дарын» республика илмий-амалий маркази директори Ш. Қирабаева имзолаган республика олимпиадаси дипломлари билан тақдирланибди. 

Р. Қудратованинг муносиб шогирдлари иккинчи марта Астанада ғалабага муяссар бўлганини илм йўлидаги шижоатли меҳнат маҳсули, деб баҳолаш мумкин. Ғалаба муборак, «Тошоноқ» мактабининг билимдон устозлари ва муносиб шогирдлари.