Президент Мактуби: агросаноат мажмуаси ривожланишининг янги имкониятлари
Президентнинг “Тўртинчи саноат инқилоби шароитларида ривожланишнинг янги имкониятлари” Мактубида илгари сурилган учинчи вазифа – “Ақлли технологиялар” – агросаноат мажмуаси ривожлантиришда олға сапчиш учун имконият”, деб аталиб, бу вазифа қишлоқ хўжалиги соҳасида меҳнат қилаётган барча фуқароларга тегишли.
Мамлакатимиз, вилоятимиз аҳолисининг аксарият қисми қишлоқ ҳудудларида яшашини, қишлоқ хўжалиги соҳасида бандлигини, шунингдек, Қозоғистон ўзбеклари азалдан асосан шу соҳа билан машғул эканлигини эътиборга олсак, Мактубдаги учинчи вазифа деярли ҳар биримизнинг эътиборимизни тортиши сўзсиз.
Агросаноат мажмуаси мамлакат озиқ-овқат хавфсизлигини таъминлашнинг энг муҳим омили. Қишлоқ аҳолисининг турмуш даражасини яхшилаш, аҳолини иш билан таъминлаш, иқтисодий ўсиш ҳам шу тармоқнинг ривожланиш даражасига боғлиқ.
Мактубда мамлакатнинг аграр сиёсати меҳнат унумдорлигини тубдан ошириш ҳамда қайта ишланган қишлоқ хўжалик маҳсулотлари экспортини ўстиришга йўналтирилиши кераклиги алоҳида таъкидлаб ўтилган.
Давлат раҳбари турли қишлоқ хўжалик маҳсулотларини етиштиришни, ғалла тайёрлашни ўрганганимиз, бу билан фахрланишимизни айтади. Аммо бунинг ўзи етарли эмаслигига эътиборни қаратади. Қишлоқ хўжалик хомашёсини қайта ишлаш ва жаҳон бозорларига юқори сифатли маҳсулотлар билан чиқиш лозимлигини таъкидлайди. Яъни, бутун агросаноат мажмуасини шу вазифани ҳал этишга тубдан йўналтириш муҳимлигини айтади.
Мактубда юқоридаги вазифани ҳал этишнинг аниқ йўналишлари белгилаб берилган.
Биринчи навбатда аграр илмнинг ривожланишига асосий эътиборни қаратиш. Бугунги кунда қишлоқ хўжалиги соҳасида янги билимларсиз янги технологияларни яратиш ва самарали татбиқ этиш мумкин эмас. Агросаноат мажмуаси барча соҳаларининг илмга бўлган эҳтиёжи тобора ортмоқда. Масала жаҳон тажрибасида ижобий тасдиғини топган илғор технологияларни ўзлаштириш ва мамлакатимиз шароитига мослаштиришдан қолган.
Элбоши аграр университетларнинг ролига алоҳида тўхталган. Улар шунчаки диплом бериш эмас, чинакамига агросаноат мажмуасида ишлаш эҳтиёжи билан “ёниб турадиган” ёки илм билан шуғулланадиган мутахассислар бўлиши керак. Бунинг учун ўқув дастурларини янгилаш, аграр университетларнинг қишлоқ хўжалиги соҳасидаги энг янги билим ва энг илғор тажрибани тарқатадиган марказларга айланишига эришиш керак. Чунончи, М. Ауезов номидаги Жанубий Қозоғистон давлат университети агросаноат мажмуаси учун мутахассислар тайёрлаш билан бирга, вилоятимизда тажриба-синов участкалари, синов-ишлаб чиқариш майдончалари яратишга жиддий эътибор қаратяпти. Профессор-ўқитувчилар ва таълим олувчилар агросаноат соҳасидаги молиялаштириладиган илмий лойиҳалар танловларида иштирок этиб, грант соҳиблари бўлмоқдалар. Уларнинг натижаси ўлароқ Сайрам, Қазиғурт ва бошқа туманларда кенг кўламдаги тажриба-синов ишлари олиб борилмоқда. Талабалар, магистрантлар ва докторантлар қишлоқ хўжалик маҳсулотларини илғор технологиялар воситасида етиштириш йўлларини амалда илм, таълим ва амалиётни биргаликда қўшиб ўзлаштирмоқдалар. Талаба-ёшларимиз орасида агросаноат соҳасидаги янги самарали ишланмалар яратиш, патентлар олишга қизиқишнинг ортиб бориши бизни, албатта, қувонтиради.
Мактубда агросаноат мажмуасини ривожлантиришнинг яна бир неча муҳим йўналишлари ўз аксини топган. Булар – экиш ва ҳосилни йиғиб олишнинг энг мақбул муддатларини олдиндан айтиш, ерни минерал ўғитлар билан бойитиб, зараркунандалар, бегона ўсимликлар билан курашнинг мукаммал тизимларини жорий қилишдир. Шунингдек, экин майдонларини ҳаводан назорат қиладиган учувчисиз техникани (масалан, квадрокоптер) қўллаш вақтни ва маблағни тежаб, меҳнат самарадорлигини оширади.
Агросаноат мажмуасини ривожлантиришнинг Мактубда ифодаланган энг самарали йўллари сифатида янги технологиялар ва бизнес-моделларни татбиқ этиш, агросаноат мажмуасида фан ютуқларидан фойдаланиш даражасини оширишни кўрсатиб ўтиш мумкин.
Қишлоқ хўжалик ширкатларини ҳар томонлама қўллаб-қувватлаш вазифаси алоҳида таъкидланган. Айниқса, майда фермер хўжаликларини бириктириш яхши самара беради.
Замонавий қишлоқ хўжалиги бизнес иштирокисиз жиддий ривожланмаслигига Президент алоҳида эътибор қаратади. Сифатли маҳсулот етиштириш, уни қайта ишлаш – бир масала, иккинчи катта масала – жаҳон бозорида унинг харидорларини топиш. Шу сабабли, Мактубда мамлакат бизнес билан ҳамкорликда жаҳон бозорларида етиштирилган маҳсулотлар сотиладиган стратегик жойларни, шароитларни топиш зарурлигини таъкидлаган.
Президент Мактубида қишлоқ хўжалик маҳсулотларини етиштиришни жадаллаштириш маҳсулот сифати ва экологик тозалигини сақлаш билан бирга олиб борилиши зарурлиги ҳам қайд этилади. Айнан шу йўл билан жаҳонга таниладиган “Қозоғистонда тайёрланган” табиий маҳсулотлар брендини яратиш ва ривожлантириш мумкин.
Мактубдаги агросаноат мажмуасига тегишли яна бир муҳим масала – ердан унумли фойдаланиш. Ҳозирда республикамизда қишлоқ хўжалигига яроқли ерларни эгаллаб, ундан оқилона фойдалана олмаётган ёки умуман фойдаланмаётган фермерлар йўқ эмас. Шу сабабли, Президент ердан унумли фойдаланишни рағбатлантириш ва самарали фойдаланиш юзасидан чоралар қўллаш кераклигини таъкидлаган.
Хуллас, яқин беш йилда агросаноат мажмуасида меҳнат унумдорлиги ва қайта ишланган қишлоқ хўжалиги маҳсулотлари экспортини камида 2,5 баравар кўпайтириш вазифаси аниқ белгиланган.
Президент Мактуби агросаноат мажмуаси ходимларига, оддий фермердан тортиб, юқори даражадаги менежерларга, қишлоқ хўжалик соҳасидаги олимларга, бўлажак мутахассисларга ривожланиш бўйича аниқ йўлланмалар берувчи дастуриламал вазифасини бажаради.