Вилоятимизда 90 йилдан бери кузатилмаган совуқ ҳамлага шайланмоқда. “Казгидромет” ЖҚВ филиалининг хабарига кўра, 26-29 январь кунлари вилоятнинг айрим туманларида ҳаво ҳарорати кечалари нолдан 25-30 даража пастга тушади, деб хабар беради BNews.kz.

– Вилоятнинг шимолида станция 25 даража совуқни кўрсатиши мумкин, бироқ бу Шимкентда ҳам худди шундай ҳарорат бўлади, деган гап эмас. Шимолда ҳозирданоқ ҳарорат -10 даража, кун совуб бормоқда. Биз келаётган аёзли кунлардан минтақанинг барча аҳолисини олдиндан огоҳлантириб қўймоқчимиз, – дейишди “Казгидромет” ЖҚВ филиалидагилар.

Шуни таъкидлаш жоизки, мамлакат жанубида симоб устуни сўнгги марта -26 даражани бундан 91 йил илгари – 1927 йил 22 январда кўрсатган экан.

Шу муносабат билан “Казгидромет” РДК Қозоғистоннинг тўртта вилоятида бўрондан огоҳлантириш эълон қилди.

24-29 январь кунлари Алмати ва Жамбил вилоятларида, 26-29 январь оралиғида эса Жанубий Қозоғистон ва Қизилўрда вилоятларида ҳаво ҳароратининг кечалари 15-20, жойларда 30-35 даражагача пасайиши кутилмоқда. Бўрон бўлиш эҳтимоли – 95 фоизга тенг.

Аёзли кунларга олдиндан тараддуд кўриб қўйишни маслаҳат берамиз.