“Ёш давлат хизматчиси” лойиҳаси бўйича келажакда ҳоким бўламан, эл бошқараман, деган мактаб ўқувчилари Шимкент шаҳар ҳокимлигининг иши билан танишиб, бир кун мобайнида ҳокимдан тортиб, унинг ўринбосарларигача ёнида ёрдамчи бўлиб юриш ҳуқуқига эга.

Мана шундай қилиб, улар давлат хизматининг сир-асрорларини болалигиданоқ эгаллаб, эл-юртнинг ташвишини қилиш қанчалик қийин эканлигини сезиб ўсишади. 

– Давлат хизматчиларининг иши осон эмас. Ёшларнинг ҳокимликдаги аниқ ишлар билан яқиндан танишишини хоҳлайман. Кейин улар дўстлари ва яқинларига ҳокимликнинг ўз кўзлари билан кўрган ишлари ҳақида гапириб беришса, – дейди шаҳар ҳокими Н. Сауранбаев.

Ушбу лойиҳада қатнашаётган ўқувчилар ҳозирча шаҳар ҳокими билан суратга тушишни орзу қилмоқдалар.

Айтганча, бир ўқувчи шаҳар ҳокимининг қошидан бир қарич ҳам узоқлашишмайди. “Ҳоким қандай бўлиши кераклигини ўрганяпман”, – дейди у. Қолган ўқувчилар ҳокимнинг ўринбосарларидан ўрганишмоқда. 

Кўпинча халқимиз “болам раҳбар бўлади”, деган мақсадни олдига қўяди. Ҳоким бўлишга қизиқадиган ўқувчиларнинг ҳам ушбу лойиҳаси ўша қизиқувчанликдан туғилган бўлса ажаб эмас. 

Айтганча, давлат хизмати сир-асрорларини билиш, давлат хизматчисининг жамиятдаги ролини оширишда бундай лойиҳаларнинг наф бериши турган гап.