Мамлакатимиздаги иссиқхоналарнинг 75 фоизи Жанубий Қозоғистон вилоятида жойлашган бўлса, Сариоғоч туманини Жанубий Қозоғистон иссиқхоналарининг Ватани дейиш мумкин. Бунинг сабаби бор, чунки вилоятдаги иссиқхоналарнинг 50 фоизи ўша туманга тегишли.

Иссиқхона хўжалиги Сариоғоч туманида йилдан-йилга кенгайиб, умумий майдони бўйича ҳам, етиштирилган маҳсулот бўйича ҳам республикада етакчига айланди. Масалан, 2007-2008 йиллари Жартитўбе ва Дербисек қишлоқ округларида 32,5 гектар ердагина иссиқхона бўлган бўлса, кейинги йиллари улар 21та қишлоқ округида жойлашиб, майдони 664 гектарга етди. Ушбу иссиқхоналарда ўтган йили 120 минг 273 тонна маҳсулот етиштирилди. Шундан, 99 минг тоннадан зиёди помидор бўлса, 21 205 тоннаси бодринг. Экинларнинг ўртача ҳосилдорлиги ҳар гектарга 1866,6 центнердан тўғри келди. 

Ўтган йили 72,2 гектар ерда иссиқхоналар қурилиб, ишга туширилди. Уларда 13 247 киши иш билан таъминланган. Етиштирилган маҳсулот асосан Қозоғистоннинг Шимолий минтақалари ва Россия Федерациясининг кўплаган шаҳарлар аҳолисининг сабзавотга бўлган эҳтиёжини таъминламоқда. 

Туманда иссиқхона хўжалигини ривожлантиришга бағишланган маҳорат сабоқлари ўтказиб турилади. Уларда мутахассислар ёпиқ тупроқда помидор, бодринг, полиз маҳсулотларини қандай қилиб кўпроқ етиштириш ҳамда иссиқхонани қандай қуриш, материал, уруғ, минерал ўғитларни танлаганда нималарга эътибор қаратиш кераклигини ўргатадилар. 

Айтганча, вилоятда иссиқхоналар майдони ўтган йили 212 гектарга ортиб, жами 1 335 гектарга етди.