Нурсултан Назарбаев Бош вазир ўринбосари Асқар Жумағалиевни қабул қилди.

Учрашувда Элбошига «Рақамли Қозоғистон» давлат дастурининг ҳамда илгари белгиланган вазифаларнинг амалга оширилиши юзасидан кўрилаётган чоралар маълум қилинди. 

– Рақамлаштириш туфайли мамлакатимиз иқтисодиёти 30 фоизга ўсиши керак, бу 2 трлн. тенгени ташкил этади, – деди Қозоғистон Президенти.

Нурсултан Назарбаев Қозоғистонда тўпланган тажриба ва ваколатни сақлаб қолиш учун рақамлаштириш соҳасидаги давлат буюртмаларини амалга ошириш масалаларини ҳал этишда мамлакат бизнесининг иштироки зарурлигини таъкидлади. 

– Рақамлаштириш дастури тасдиқланди, бунинг учун давлат томонидан катта маблағ ажратилмоқда, улардан самарали фойдаланиш керак.

Асқар Жумағалиев Қозоғистон Президентини «Рақамли Қозоғистон» давлат дастурининг бажарилишидан келиб чиқадиган натижалар билан таништирди. 

– Кончилик саноатига рақамлаштиришни татбиқ этиш туфайли маҳсулот таннархи пасаяди, қазиб олиш ортади. Шунингдек, биз электрон тижорат соҳасида 200та янги иш ўрни очишни режалаштиряпмиз. Дастлабки ҳисоб-китобларга қараганда, солиқ ва бож хизматларини рақамлаштиришдан давлат хазинасига 100 млрд. тенгедан зиёд маблағ тушади, – деди Бош вазир ўринбосари.

Учрашув ниҳоясида Давлат раҳбари «Глобаллашув давридаги рақамли кун тартиби» мавзусидаги халқаро форумга тайёргарлик ҳақидаги ҳисоботни тинглаб, қатор аниқ топшириқлар берди.