Фашизм устидан қозонилган Ғалабанинг 72 йиллиги ер юзининг кўплаган давлатларида муносиб нишонланди. Жумладан, Шимкент шаҳрининг Сайрам аҳоли манзили марказида Иккинчи жаҳон урушида жасорат кўрсатганлар учун ўрнатилган ёдгорлик қошига ҳам тумонот одам йиғилди.

Машъум уруш асоратлари, унда мардонавор жанг қилган сайрамликлар ва ана шу заминдан чиққан қўш қаҳрамон – Зиёмат Ҳусанов ва Бўтабой Содиқовларнинг жасорати ҳақида тўлқинланиб гапирган Абубакир Хонхўжаев тадбирни очгач, Қозоғистон Мадҳияси янгради ва ёдгорлик пойига гулчамбарлар қўйилди.

Шимкент шаҳар Қаратау тумани ҳокими Ғабит Мауленқуловнинг табригидан сўнг шу кунларда 92 ёшини қарши олаётган Улуғ Ватан уруши қатнашчиси Ҳасан Қамбаров Ватанимиздаги тинчлик, бирлик, Элбоши олиб бораётган оқилона сиёсат, ёши катталарга кўрсатилаётган ғамхўрлик ҳақида гапирди. 

“Сайрам” коллежи директорининг ўринбосари Алишер Собиров талабалар номидан қаҳрамон отанинг кифтига тўн ёпгач, даҳадаги ҳарбий таълим ўқитувчилари номидан капитан М. Мирзаҳмедов тадбир иштирокчиларини 7 май – Ватан ҳимоячилари куни, 9 май – Буюк Ғалаба куни, Қозоғистон Қуролли кучларининг 25 йиллиги байрамлари билан қутлади. 

Тадбирга Мираҳрор Мирмадиевнинг “Қазақстан сарбаздары” қўшиғи, 12-спорт мактаби тарбияланувчилари ва Е. Юсупов номли мактаб ўқувчиларининг чиқишлари файз киритди.

Қаратау туман ўзбек этномаданият бирлашмаси номидан сўзга чиққан К. Пўлатбоев ватанпарварлик руҳида ўтган тадбирнинг моҳиятига юксак баҳо берди.