Бу йил Буюк Ғалабанинг 72 йиллиги байрами мамлакатимиз пойтахти – Астанада, шунингдек, барча шаҳар ва қишлоқларда кенг нишонланди. Сайрам тумани маркази – Оқсувкентда ушбу айёмга ўзгача тайёргарлик кўрилди. 

Бу бежиз, эмас. Чунки, иккинчи жаҳон урушида душманни она юртимиздан қувиб чиқаришда собиқ Иттифоқнинг барча аскарлари қатори, сайрамликлар ҳам мардлик намуналарини кўрсатгани тарихдан маълум. Совет Иттифоқи қаҳрамонлари Зиёмат Ҳусанов, Тоштемир Рустамов, Бўтабой Содиқов ва Владимир Вишневецкий каби мард ҳамюртларимиз билан ҳар қанча фахрлансак арзийди.

Ўтган шанба куни эрта тонгдан марказий истироҳат боғига кўкси орден ва медаллар билан тўла уруш фахрийлари, фронторти меҳнаткашлари, байналмилалчи жангчилар ва семейчилар оқиб кела бошлади. Майдон узра уруш йиллари қўшиқлари янгради. Тантанали тадбирда туман маданият уйи ходимлари, коллеж ҳамда мактаб ўқувчилари иштирокида суронли уруш бошланган куни бизнинг ҳудуддан йигитларни фронтга жўнатиш лаҳзалари, Ленинград қамали чоғидаги аянчли воқеалар саҳна кўринишлари орқали намойиш қилинди. 

 Сўнгра, саҳнага Сайрам тумани ҳокими С. Сапарбаев ва маслаҳат котиби Ж. Сулейменов кўтарилиб, йиғилганларни буюк Ғалабанинг 72 йиллиги билан самимий муборакбод этаркан, ҳамюртларимизнинг душман билан бўлган шиддатли жангларда кўрсатган мислсиз жасорати ёш авлод учун ҳамиша намуна мактаби эканини қатъий таъкидлаб ўтишди. Шундан кейин истеъфодаги генерал майор М. Ўразалиев, Сайрам туманининг фахрий фуқаролари М. Сапарбаев, Ў. Алиев, Т. Роҳатов, 

А. Байназар сўз олиб, уруш йиллари бошдан кечирган қайғули ва аянчли воқеаларни гапириб беришди. Яна турли тилларда ватанпарварлик руҳидаги қўшиқлар янграб, рақслар ижро этилди. Ёш аскарларнинг саф тортиб шахдам одимлар ташлаб, майдон бўйлаб ўтиши, спортчиларнинг чиқишлари тадбирга ўзгача шукуҳ бағишлади. 

Бу каби тадбирлар туманнинг бошқа жойларида ҳам уюштирилди.