Шимкентдаги 26-сонли Ж. Жабаев номидаги мактаб-гимназияда Жанубий Қозоғистон вилоят педагогика университетининг собиқ президенти, педагогика фанлари номзоди Бахтиёр Юнусов номидаги инглиз тили кабинети иш бошлади. Уни олимнинг фарзанди, Жанубий Қозоғистон олий педагогика коллежи президенти Ифтихор Юнусов очди.

– Болалар глобаллашув жараёни билан ҳамнафас бўлишлари учун, шубҳасиз, инглиз тилини яхши билишлари керак. Зеро, бугунги кунда халқаро муносабатларни ривожлантиришда ҳам чет тилини мукаммал билиш талаб этилади. Бу кабинетни очишимдан мақсад – болаларнинг инглиз тилини мукаммал ўрганишларига имконият яратиш, – деди Ифтихор Юнусов тантанали очилиш маросимида.

Мактаб-гимназия директори Халида Усипханқизи табрик нутқида Жанубий Қозоғистон олий педагогика келлежи вакилларига миннатдорчилик билдирди.

– Бугунги кунда инглиз тилининг аҳамиятини тушунтириб ўтиришнинг ҳожати йўқ. Зеро, хориж давлатлари билан алоқа тили – инглиз тили, бизнес соҳасида халқаро жамият мутлақ инглиз тилидан фойдаланади, – деди у. – Элбошимиз Нурсултан Назарбаев «Келажакка йўлланма: маънавий янгиланиш» дастурий мақоласида ёшларни ушбу тилни мукаммал эгаллашга чақирди ва бу бежиз эмас. Чунки, инглиз тили дипломатия, халқаро сиёсат, халқаро анжуманлар тилидир.

Мактаб-гимназия ўқувчилари ҳам ҳомийга миннатдорчилик билдириб, қозоқ ва ингилиз тилларида дил изҳорларини баён этишди.