Қозоғистон Президенти Нурсултан Назарбаев Россия Президенти Владимир Путин билан телефон орқали суҳбатлашди, дея хабар беради Kazpravda.kz. 

Қозоғистон Президенти матбуот хизматининг хабарига кўра, икки давлат раҳбари жорий йил 29-30 январда ўтган Сурия миллий музокаралари Конгресси натижаларини муҳокама қилишди. Нурсултан Назарбаев Сурия инқирозини мувофиқлаштиришда Россиянинг ҳиссаси катта эканини таъкидлади. 

Шунингдек, суҳбат давомида икки томонлама ҳамкорликнинг муҳим жиҳатлари ва шу кундаги долзарб масалалар тилга олинди. Чунончи, сиёсий, савдо-иқтисодий, маданий ва гуманитар соҳаларда истиқболдаги аниқ режалар ҳамда икки мамлакатнинг халқаро ташкилотлардаги фаолиятига эътибор қаратилди.

«Шунингдек, Давлат раҳбарларининг суҳбатида Евроосиё ҳукуматлараро кенгаши мажлисида ҳамда Алматида ўтган «Глобаллашув даврига рақамли кун тартиби» форумида қабул қилинган ҳужжатлар асосида Евроосиё иқтисодий интеграцияси доирасида Қозоғистон ва Россиянинг ўзаро ҳаракатлари ҳам келишиб олинди», хабар беради матбуот хизмати.

Суҳбатда икки давлат ўртасидаги дўстлик ва яхши қўшничилик муносабатлари самарали ҳамкорликни ривожлантиришда эришилган улкан муваффақиятлар эътирофи экани, икки томонлама муносабатларда тўпланиб қолган кўплаб, шу жумладан, анча мураккаб масалаларни ҳал қилишда катта натижаларга эришиш имконини берган ҳамкорликни янги даражага олиб чиқиш муҳим аҳамиятга эга экани таъкидланди.