Авваллари одамларда сабр бор эди. Қаноат бор эди. Улар нафсини жиловлашни билишарди. Шунинг учун у пайтдаги маҳсулотлар экологик жиҳатдан тоза бўлган. У пайтнинг одамлари тоққа чиқиб, равочга минерал ўғит солишмаган. Улар олтинга мис, мисга темир аралаштиришмаган. Шунинг учун аввалги олтинлардай тоза олтинни ҳозир топиш қийин.
Авваллари ариқ сувининиг тозалигига шубҳа қилишмаган, ҳозир булоқ сувини ҳам ўйлаб ичасиз.
Илгари ҳаракатлар ҳам аниқ эди: "келдим, кўрдим, енгдим...".
Ҳиссиёт ва фикрлар равшан эди: «Афлотун дўстим, лекин ҳақиқат улуғроқдир». Илгари ҳаром билан ҳалолнинг чегараси аниқ эди, ҳаромга қўл урган одамдан ҳам ҳазар қилишарди. Ҳозир эшитиб қоламиз: "Улфатлар тўйдан чиқиб, чойхонада йиғилиб, антиқа таом тайёрладик. Катта кўппакни сўйиб, қовуриб едик". Тўқликка шўхлик эмасми? Дўконлар бўшаб, одамлар туни билан нонга навбатга турган замонда ҳам фалончи ит гўштини ебди, деган гапни эшитмаганмиз. Ҳозирги, улфатлар тўйдан чиқиб...
Йигирма биринчи аср... Тараққиёт чархпалаги шунчалик тез айланяптики, маҳсулотнинг тури йил сайин эмас, соат сайин кўпаймоқда. Нима ҳисобига? Бир-бирига аралаштириш, қориштириш, омихта қилиш ҳисобига, албатта. Икки фан тўқнашган жойда учинчиси пайдо бўлиб, тўртинчисига қуйилиб, еттинчиси ҳосил бўляпти. Ҳатто санъат спортга, спорт ишга, иш ойликка, ойлик санъатга аралашиб кетяпти. Фирибгарлик, алдаш «санъат»га айланиб, ривожланмоқда. Бу санъат ишга қабул қилишда ҳам, ишга киришда ҳам баъзи бировларга асқотяпти. Коррупцияга қарши кураш кучайяпти, лекин порахўрлик ҳам уюшган жиноятчиликка қарши курашаётганга ўхшайди.
Синтез эпидемияси бошланиб, бозорларда гибрид, турли озиқ-овқат аралашмалари пайдо бўлдики, Менделеев ҳаёт бўлганида бошини чангаллаб қоларди. Натижада шифохонаю касалхоналар тўлиб, беморлар эрталабдан кечгача навбат кутишга мажбур. Шифокорлар етмай қоляпти. Буларнинг барчаси инсон ва табиат орасидаги мувозанатнинг йўқолиб бораётгани туфайли, албатта. Давлатимиз раҳбари Н. Назарбаев ҳам бундан хавотирда. Чунончи, у “Келажакка йўлланма: маънавий янгиланиш” дастурий мақоласида шундай ёзади: “Халқимиз асрлар бўйи туғилган заминнинг табиатини кўз қорачиғидай асраб, унинг бойлигини тежамли ҳамда ўринли ишлатадиган тенгги йўқ экологик турмуш тарзига амал қилиб келди. Фақат ўтган асрнинг ўрталарида, атиги бир неча йил ичида миллионлаб гектар даламиз аёвсиз шудгорланди.
Олис замонлардан бери авлоддан авлодга ўтиб келган миллий прагматизм саноқли йилларда одам танимас даражада ўзгариб, ҳаддан ортиқ исрофгарчиликка олиб келди. Шунинг касридан Она-Ер яратилгандан бери майсанинг боши тулпорлар туёғи билангина эзилган даланинг бутун бойлиги гирдобга кетди. Тош ташласанг, унадиган минглаб гектар унумдор ерларимиз экологик офат минтақаларига, Орол денгизи эса қовжираган тақир чўлга айланди”.
1875 йили чиққан «Пчела» журналида ёзувчи Н. Добролюбовнинг шундай фикри берилган эди: "Агар жамиятда иллат пайдо бўлса, иллатга қарши курашиш бефойда, унинг илдизини йўқотишга ҳаракат қилиш керак". Демак, авваламбор, ана шу озиқ-овқат аралашмаларию турли дурагай ўсимликлар мевалари рекламасига барҳам бериш лозим. Эътибор беринг: «Грейпфрут (апельсин ва лимонни чатиштириб олинган янги мева) организмнинг курашиш қобилиятини оширади, ишемик инсультдан асрайди, юзни ёшартиради. Уни йил давомида еб боринг», дейилади бир рекламада. Бир кунда иккитадан ортиқ грейпфрут ейиш ошқозон-ичак йўлига салбий таъсир кўрсатиши, санчиқлар пайдо қилиши мумкинлиги, ичак фаолиятини бузиб, қабзиятга олиб келиши ҳақида лом-лим дейишмайди.
Элбошимиз “Аниқ мақсадга етиш, билим олиш, соғлом турмуш тарзига амал қилиш, касбий жиҳатдан такомиллашувга устунлик берган ҳолда, ана шу йўлда ҳар бир нарсадан самарали фойдаланиш – феъл-атвор прагматизми дегани шу”, деб куйинсаю, ОАВда соғлом турмуш тарзини бузадиган маҳсулотлар реклама қилинса.
Доимо овқат ўрнига турли аралашмалар истеъмол қилиб юрадиган одамларда тоза ҳис-туйғу нима қилсин? Ахир аралаш ҳиссиётлар дегани умуман ҳеч қандай ҳис йўқ дегани эмасми?
Ёқимли-ёқимсиз, яхши-ёмон, ишонч ва умидсизлик каби ҳислар бир-бирига аралашиб, ўртада фаросат йўқолиб боряпти. Айниқса, ёшларда. Фаросат йўқ жойда имон ҳам бўлмайди. Гоҳо автобус ёки бошқа жамоат транспортида телефон орқали бир-бири билан сўкиниб гапираётган ёки қулоққа айтиладиган гапларни баралла айтаётган йигит-қизларни учратиб қоламиз. Тўйларда янгаларни жонидан тўйдираётган улфатларни учратамиз. Ҳожибой Тожибоев ҳаётлигида хиёбонларда, одамлардан тортинмай қучоқлашиб ўтирган йигит-қизларни ҳали ҳам учратяпмиз. Сабаби, улар ўзларини бошқалардан кўра устунроқ, маданиятлироқ деб биладилар.
Сабаби, улар маза-бемаза чет эл сериалларини кўриб, улардан ўрганиб яшаяптилар. Шунинг учун ўзларини худди ўша кинолардагидек жуда эркин тутадилар. Масжидларга кираверишда «Биродарлар, бу ерда қўл телефонларингизни ишлатмасликни сўраймиз», деб ёзиб қўйишган. Энди бундай эълонни автобус ёки бошқа жамоат уловларига осиб қўйиш керак, шекилли?
Фаросат ҳеч қаерда сотилмайди. У одамнинг онг-шуурига сут билан кирадиган нарса.
“Биз ёт мафкураларнинг таъсири ҳақида айтганда, уларнинг ортида бошқа халқларнинг маълум бир қадриятлари ва маданий рамзлари турганини ёдда тутишимиз зарур. Демак, уларга ўзимизнинг миллий қадриятларимиз орқалигина зарба бера оламиз”. Бу таклиф ҳам Давлатимиз раҳбарининг дастурий мақоласида айтилган.
Абдулла Қодирий “Ўткан кунлар” романини “Мозийга қайтиб иш кўрмоқ – хайрлидир”, деб бошлайди. Дарҳақиқат, “Ўткан кунлар” – маънавиятимизнинг олтин хазинаси. Хиёбонларда одамлар кўз ўнгида бир-бирининг пинжига тиқилиб ўтирган ёшлар Отабек ва Кумушнинг муҳаббатидан ўрнак олишлари керак.
Элбошимиз ҳам дастурий мақоласида “Ажабтовур янгиланган жамиятнинг ўз томири – тарихининг қаъридан бошланадиган маънавий коди бўлади. Янги шаклдаги янгиланишнинг энг асосий шарти – шу миллий кодингни сақлай билиш. Усиз янгиланиш деганингизнинг қуруқ сафсатага айланиб қолиши ҳеч гап эмас”, деб маънавиятни юксалтириш масаласига жиддий эътибор қаратган.
Ривоят қилишларича, бир хонада тўртта шам ёниб турар экан. Замон ўтиб, одамлар ўзгариб, хонадаги биринчи «имон» деб номланувчи шам ўчибди...
– «Имон» ўчган жойда мен ҳам узоқ ёна олмайман, – деб «эзгулик» номли иккинчи шам ҳам ўчибди.…
– «Имон» ва «эзгулик» ўчган хонани мен ҳам ёрита олмайман, – деб, «меҳр-муҳаббат» шами ҳам ўчибди.…
Ушбу хонага кириб бир киши:
– Эҳ, нақадар қоронғу бу хона. На Имон, на Эзгулик, на Меҳр-муҳаббат бор, – деб ортга қайтаётса, тўртинчи шам:
– Тўхтанг, – дебди.
– Сен қандай шамсан? Нега ҳалиям ёниб турибсан? – сўрабди ҳалиги киши.
– Мен ўчсам, бу хона қоп~қоронғу бўлиб қолади. Мен ёниб турган эканман, қолган учта шам ҳам бир куни ёниши мумкин. Чунки мен «умид» шамиман, – деган экан.
Умид узиш – Аллоҳнинг раҳматидан ноумид бўлиш, демакдир. Демак, кун ўтиб, бир кун ушбу мақолада тилга олинган барча камчиликлар бартараф этилиб, ҳар бир инсоннинг қалбида имон, эзгулик, меҳр-муҳаббат шамлари ёнади. Ҳаётимиз нурафшон, оқибат деворлари мустаҳкам бўлади.
Маънавий янгиланишнинг бош талаби ҳам шу.