Сўнгги пайтларда дорихоналар кўпайиб кетди. Қайси кўчага кирманг, дорихона. Тўғри, экологик вазият ночорлашиб, касалликлар сони ортиб бормоқда. Лекин дорихонадаги дорилар фақат танани соғломлаштира олади, холос. Қалбни-чи, қалбни нима соғайтиради? Ахир уни вақти-вақти билан даволаб, озиқлантириб турилмаса, инсоннинг қалб кўзи кўр бўлиб қолиши ҳеч гап эмас. Албатта, қалбнинг давоси – китоб. Шунинг учун азал-азалдан халқимиз илмни қадрлаб, китобни севган ва ўзига дўст тутинган. Қалб саломатлиги ҳақида қайғураётган ҳамюртларимиз кўпми, улар ҳозирги кунда қандай китобларни мутолаа қилмоқда. Шу савол билан ижтимоий тармоқдаги бир гуруҳ дўстларимизга мурожаат этдик.

Гуландом Долимова С. Цвейгнинг “Мария Стюарт” китобини, Шукуржон Шониғматов А. Қодирийнинг “Ўткан кунлар” романини, Ирода Муҳаммаджонова Ронда Берннинг “Куч”, Маҳмудхон Мансуров Баҳодир Нурмуҳаммаднинг “Одам”, Наргизахон Ортиқова Муҳаммад Содиқ Муҳаммад Юсуфнинг “Хислатли ҳикматлар шарҳи”, Муҳаммад Солиҳнинг “Кўзи тийран дард”, Мухлис Вафоев Стендальнинг “Қизил ва қора” романини, Гулираъно Расулова Наполеон Хиллнинг “Думай и богатей”, Гулмира Режабалиева М. Булгаковнинг “Мастер и Маргарита” китобини ўқиётганини ёзишган.

Гулнаҳор Режабалиева “Саодат асри”нинг учта жилдини, Муножат Эргашева “Пайғамбарлар қиссаси”ни тугатиб, “Тафсири ҳилол”ни бошлаганини маълум қилган. Шунингдек, Дилфуза Абдураҳимова Румийнинг “40 ривоятга 40 маснавий” китобини ўқиб тугатган, энди “Қуръон қиссалари”ни ўқишни бошлаганини ёзиб юборган.

“Интернет бор, китобнинг нима кераги бор?” деб ёзибди Собит Олимов. “Фейсбукка киргандан бери китоб ўқий олмадим. Интернетга киришни бас қиламан, шекилли” – бу Иброҳим Азимжоновнинг сўзи.

Китобга қизиқиш болаликдан бошланади. Эртак эшитмаган болани адабиётга қизиқтириш мумкин эмас.  Сарёмий номли мактаб-лицей ўқувчиларининг бу борадаги ташаббуси таҳсинга лойиқ. Улар ўқув йили давомида ҳар бир ўқувчининг 100та китоб ўқиши бўйича мусобақа уюштиришган.

Инсоннинг маданияти юксалган сари эзгу амалларга интилаверади. Шундай экан, билим манбаи, ақл чироғи – китобни ота-боболаримиз каби қадрлайлик, унга ошно бўлайлик!