«Жанубий Қозоғистон» газетаси саҳифаларида доимий ёритилиб келаётган, кўпчиликка дахлдор мавзулардан бири – тўйлар ва шунга оид ўйлар. Учрашув ва йиғилишларда минбарга чиқиб гапирганимизда, гўё ҳаммамиз якдил ихчам, исрофсиз, дабдабасиз тўйлар тарафдоримиз. Аммо амалда шу нарса, афсуски, рўёбга ошавермайди. 

Яқинда Туркистонда бир тўйда бўлдик. Таклифномада тўйнинг бошланиши кеч соат 20.00га деб кўрсатилган. Меҳмонлар жамулжам келишганига қарамай келин-куёв қандайдир сабабларга кўра тўйхонага кечикиб келганлиги туфайли тўй тунги соат 24.00да бошланди. Аксарият меҳмонлар тўй соҳибига тўёналарини топшириб, овқатга ҳам қарамай кетиб қолишди. 

Ахир тўй инсоннинг умрида бир марта бўладику. Орзу- ҳавас, ният. Нега тўй тўрт соат кечикиб бошланди. Нега бунга йўл қўйилди? Аниқ сабаби йўқ. Қачонгача меҳмонларнинг асаби бузилиши керак? Бунга ким айбдор? Ёшларми ё катталар? 

Халқимизда, қамишни бўш ушласанг қўлингни кесади, деган нақл бор. Қозоғистон қонунларига кўра кеч соат 23.00дан кейин жамоатчилик тинчини, осойишталигини бузиш ман этилади. Бизда эса бу вақтдан бир соат ўтгач – шовқин сурон, дабдаба билан тўйлар бошланади. Иқтисодий бақувват, ҳамёни қалин тадбиркорлар билан ... ойликка ишлаб... нафақага қараб ўтирганларнинг осмон билан ердай фарқи бор. Негадир тадбиркорларнинг дабдабали тўйларига тақлид қилиб, чамамиз келса ҳам, келмаса ҳам, қарз кўтариб бўлса ҳам шундай тўй қилишга чиранамиз. Нега? Ахир бунинг ўрнига тарбия, маънавият, камтарлик, ўзбекона одоб борасида бир-биримиздан ўзишга ҳаракат қилсак, нур устига нур эмасми? Китоб, газета мутолаасига кўпроқ эътибор қаратайлик. 

Оғайнилар, дўппини бундоқ бошдан олиб, ўйланиб кўрайлик. Энг олис масофа ҳам дастлабки қадамдан бошланади. Тўйларимизни тартибга келтирайлик. Шу ишда барчамиз ҳамжиҳат бўлайлик.