2018 йил 1 январдан эътиборан ўқитувчилар маоши 30 фоизга ортди. Таълим соҳасининг янгиланган дастури доирасидаги янгилик 1-2-5-7-синф ўқитувчиларигагина тааллуқли. Келгусида босқичма-босқич барча ўқитувчиларнинг ойлик маоши ошади. Буни минтақавий коммуникациялар хизматида ўтган матбуот анжуманида Таълим бошқармаси раҳбари И. Сағиндиқов маълум қилди. 

Унинг таъкидлашича, бу йил 1 сентябрдан бошлаб, 3-6-8-синфлар, 2019 йили 0-4-9-10-синфлар, 2020 йилдан 11-синф ўқитувчи-устозларининг маошлари ҳам 30 фоизга ошади.

– Қишлоқ мактаблари ўқитувчиларининг маошларига тоифаларига қараб ўрта ҳисобда 21-30 минг тенге атрофида маблағ қўшилади. Шаҳар мактаблари ўқитувчилари маошларига ўрта ҳисобда 17- 24 минг тенге миқдорида қўшимча ҳақ тўланади, – деди Исатай Ўмирзақули.

Шунингдек, йиғилишда бошқарма раҳбари минтақадаги таълим соҳасининг асосий янгилиги сифатида ЯМТга тайёрланишга мўлжалланган httr://ontest.Kz дастури билан таништирди. Мактаб ўқувчилари имтиҳонга тайёрланиш учун онлайн тартибда ушбу сайтга кириб, ўз билимларини синаб кўра олишади. 

Ўқувчи тармоқда ишлаши учун исми-шарифи, электрон почтаси паролини, тумани ва ўзи ўқийдиган мактабини киритиб, рўйхатдан ўтиши жоиз. 

Шунингдек, ўқувчи қайси саволларга нотўғри жавоб берганини кўра олади. Республикада илк бор йўлга қўйилган тармоқ бепул фаолият юритади.