“Нұр Отан” партияси Жанубий Қозоғистон вилоят филиали Сиёсий Кенгаши бюросининг дастлабки йиғилиши ўтди. 

Бюрода ер муносабатлари, қурилиш, энергетика, уй-жой коммунал хўжалиги соҳаларига оид муҳим масалалар муҳокама қилинди.

Вилоят ер муносабатлари бошқармаси раҳбари Сўзақбай Абдиқулов тупроқ унумдорлигини сақлаш мақсадида алмашлаб экишнинг аҳамияти тўғрисида маъруза қилди.

– Ҳозирги кунда қонунга мувофиқ фойдаланилмаётган ерларни туман ер жамғармасига қайтариш бўйича тадбирлар юритилмоқда. Сўнгги 2 йилда фойдаланилмаган 248 минг гектар ер аниқланиб, 83 200 гектар ер эгалари огоҳлантирилди, – деди у.

- Жанубий Қозоғистон вилоятида ком­­мунал хизматлар қимматлашмоқда. Ма­салан, бир кубометр газга истеъмол­чилар 34-36 тенге тўлайди. Ақтўбе ва Шимолий Қозоғистон вилоятларида тариф 9-12 тенгени ташкил этади. Ҳатто бундай вазиятда раҳбарлар баҳони пасайтириш эмас, аксинча, оширишини сўрайди, – деди бюро аъзоси, вилоят маслаҳати депутати Ўмирзақ Мелдеханов.

– Қозоғистон бўйича ягона тариф кири­тиш бўйича биз вазирликка таклиф юбордик, лекин бу масала ечимини топмади, – деди вилоят энергетика ва турғун уй коммунал хўжалиги бошқармасининг раҳбари Марғулан Марайим. 

“Нұр Отан” партияси ЖҚВ филиали раи­си­­­нинг биринчи ўринбосари Нурмахан Жўлдасовнинг таъкидлашича, сўнгги уч йилда коммунал хизматлар баҳоси бир неча марта ўсган. 

Газ, сув, электр қуввати баҳоларининг қимматлиги аҳолини ташвишга солмоқда. Вилоят партия филиалининг жамоат қабу­лига бу масала юзасидан кўп аризалар келмоқда. 

Шунингдек, бюро йиғилишида минтақада “Нурли ер” дастури доирасида миллий жам­ғармадан ва бюджетдан ажратилган маб­лағнинг мақсадли ва серунум сарф­ланиши, юритилаётган қурилишлар сифати ва бош­­қа муҳим масалалар кўрилди. Мажлис яку­ни юзасидан қарор қабул қилиниб, бюро аъзо­лари кўрилган барча масалаларни назо­­­ратига олишни маълум қилди.