БМТ Хавфсизлик кенгаши раиси Қозоғистон раҳбарига миннатдорчилик билдирди

Қувайт Элчихонаси Қозоғистон – Қувайт орасидаги дипломатик алоқаларнинг 25 йиллиги ва Қувайтнинг Миллий кунига бағишланган расмий қабул ўтказиб, унда ушбу давлатнинг Фавқулодда ва Мухтор элчиси Тариқ Абдулла ал Фараж Қозоғистоннинг БМТ Хавфсизлик кенгашидаги раислик фаолиятига юқори баҳо берди. 

– Ўтган ойда Қозоғистоннинг БМТ Хавфсизлик кенгаши раислиги муваффақиятли ўтди. Сизларнинг ташаббусингиз билан дунё миқёсидаги муҳим масалаларга эътибор қаратилди, чунончи, терроризм ва экстремизмга қарши кураш, ядро қуроллари хавфини бартараф қилиш каби муаммолар кўтарилиб, Сурия ва Украинадаги аҳвол муҳокама қилинди.

 Шунингдек, у Қозоғистон тарихда жаҳон миқёсида биринчилардан бўлиб ядро қуролидан воз кечган мамлакат эканлигини ҳам яна бир бор эслатди. Қозоғистон ёпган ядро полигони ҳажми жиҳатидан дунёдаги тўртинчи арсенал бўлганлигини, Марказий Осиёни ядросиз ҳудудга айлантиришга баҳоли қудрат ҳисса қўшгани ҳам тилга олинди. Ядросиз ҳудудни Шарқда ҳам барпо этиш таклифи билан чиққан Н. Назарбаев 2013 йили Эрон ядро дастури бўйича Алматида музокаралар ўтказган эди. Бу масала ижобий ҳал бўлди.

 – БМТнинг “Глобал стратегик ташаббус -2045” режасининг 100 йиллиги доирасида Қозоғистон амалга ошираётган ишлар жаҳон тараққиётини янги босқичга кўтариши шубҳасиз, – деди Тариқ Абдулла ал Фараж.

Ўз навбатида ҚР Ташқи ишлар вазири Ақилбек Камалдинов Қувайтнинг минтақадаги энг муҳим ҳамкор мамлакат эканини маълум қилди. 

– Бугунги кунда икки эл ўзаро ишончга асосланган конструктив музокаралар даражасига чиқди. Биз бир-биримизнинг ташаббусларимизни қўллаб-қувватлаймиз. Савдо-иқтисодиёт соҳасида эса алоқалар доирасини янада кенгайтириш мумкин, – деди у.