Вилоятда ўтган йили 202 гектарда иссиқхоналар барпо этилиб, режа 9 фоиз ортиғи билан бажарилган, минтақадаги жами майдони 1325 гектарга етиб вилоятнинг республикадаги улуши 80 фоизни ташкил этган эди.

Давлат раҳбари “Тўртинчи саноат инқилоби шароитларида ривожланишнинг янги имкониятлари” Мактубида агросаноатда меҳнат унумдорлиги тубдан оширилиши ва қайта ишланган маҳсулот экспортини кўпайтиришга қаратилиши зарурлиги таъкидланганди. Шунга биноан минтақа раҳбари 

Ж. Туймебаев соҳа вакилларига 2018 йили иссиқхоналар майдонини яна 200 гектарга кенгайтиришни топшириганди.

Вилоятдаги иссиқхоналарнинг асосий қисми Сариоғоч (72,21 гектар), Қазиғурт (29 гектар), Туркистон (18,27 гектар) ва Ўрдабоши тумани (16,05 гектар)да. 

Шунингдек, вилоятда сабзавот етиштириш билан шуғулланадиган мамлакатимиздаги энг йирик “Аделя” иссиқхонаси фаолият юритади. “Агробизнес-2020” дастури бўйича амалга оширилган бу лойиҳанинг сармоявий ҳажми – 5,3 млрд. тенге. Умумий майдони 16 гектардан иборат бўлган иссиқхонада йилига 8,4 минг тонна маҳсулот етиштирилади. Унинг 70 фоизи вилоятимизда сотилса, 30 фоизи Россияга экспорт қилинади.

Бундан ташқари, Қазиғурт туманидаги “Гул Мансур” МЧБ лола етиштириш билан шуғулланади. Умумий майдони 2,5 гектардан иборат. Ўтган йили 45 минг дона гул олинган. Лойиҳа қиймати 12 млн. тенге.

Вилоят статистика департаментининг маълумотларига кўра 2017 йили иссиқхоналарда 114,3 минг тонна сабзавот маҳсулотлари етиштирилган. Шундан 62,6 минг тоннаси помидор, 51,7 минг тоннаси бодринг.