Доимий обуначимиз, Туркистоннинг Югнак қишлоғидаги йирик хўжалик ташкилотчиси, қишлоқда болалар боғчасини бунёд этган, боғлар яратган, етти хазинанинг бири – чорвачиликни ривожлантирган Фарҳод Абдужалил ўғли Абдуллаев тақвимдаги байрамлар орасида Наврўзи оламни алоҳида қадрлайди. 

Тун ва кун тенглашган, шарқ халқлари учун янги йилнинг боши саналувчи Наврўзи олам ташрифи билан табиат уйғониб, деҳқонлар меҳнат қучоғига интиладилар. Инсоният тирикчилик деб аталмиш уммон ичра енг шимариб меҳнат қилишга киришади. 

– Мен қадрдон юртимиз, муҳтарам Элбошимиз билан фахрланаман. У тинчлик, тотувлик, тараққиётга қаратилган сиёсатини қўллаб-қувватлаймиз. Аҳли деҳқон ва чорвадорлар учун яратилаётган имкониятлар ҳам кўп. Меҳнат ва яна меҳнат қилиш орқали юксак хирмонлар яратиш бободеҳқонларимизнинг фахрли бурчи. «Жанубий Қозоғистон» газетаси учун эса Давлатимиз раҳбарига фахр билан яна миннатдорчилигимизни изҳор этамиз, – дейди Фарҳод ака. 

P.S. «Жанубий Қозоғистон» таҳририяти Фарҳод Абдуллаевни Наврўзи олам билан бақамти келган таваллуд айёми муносабати билан муборакбод этиб, умр йўлдоши Зоҳира Муромад қизи билан бахтли, саодатли ҳаёт кечиб, азиз фарзандлари, невара, эвара, чевараларининг тўйларида бош-қош бўлиб, қўша қаришларини тилайди!