Вилоятнинг Ўтрор ва Сариоғоч туманларида “Шымкент” ижтимоий-тадбиркорлик корпо­­рацияси ташаббуси билан “Замонавий техно­логия асосида маккажўхори етиштириш” мав­­зуида семинар ўтди. 

Тадбирда икки туманнинг ҳоким ўринбосарлари ва қишлоқ хўжалиги бўлимлари ҳамда 100дан зиёд йирик деҳқон хўжаликлари раҳбарлари иштирок этишди.

Семинар давомида фермерларга Россиянинг “Кубань” агрохолдинги ва Қозоғистоннинг  “Агроимпекс” МЧБ мутахассислари “Ладожский” дурагай маккажўхори навининг афзалликлари ҳақида батафсил маълумот ва маслаҳатлар беришди. Шунингдек, улар “Ладожский”  навини тажриба сифатида икки тумандаги 3 гектар майдонда экиб кўриш масаласини муҳокама қилишди.

Жанубий Қозоғистон вилоятининг иқлими бу навни экишга жуда қулай, деди мутахассислар. Энг муҳими, чорвачилик ва паррандачилик хўжаликлари ушбу озуқабоп маккажўхоридан омихта ем сифатида фойдаланиши мумкин. Керакли технологияларни тўлиқ сақлаган ҳолда янги нав экилган ҳар гектардан 10-12 тонна ҳосил олиш имкони мавжуд. Масалан, март ойида қадалган уруғ ёз охирида ҳосил бера бошлайди. Яъни, тахминан 98 кунда пишиб етилади. Янги навнинг энг муҳим жиҳати – қурғоқчиликка, касаллик ва зараркунандаларга чидамли.

 “Ладожский”  маккажўхори уруғлигини хўжаликлар “Агроимпекс” МЧБ омборларидан харид қилишлари мумкин.