Наврўз байрами арафасида Сайрам туман маслаҳати депутати, тадбиркор Файзулла Алиқулов муассислигида Қорабулоқда фаолият кўрсатаётган “Мадина-3” болалар боғчаси қошида 120 ўринли қўшимча бино фойдаланишга топширилди. 

Ирода Алиқулова мудиралик қилаётган боғча тарбияланувчилари сони эндиликда 320 нафарга етди. Ўн уч гуруҳдаги жажжи ўғил-қизларнинг тарбияси билан эса 60 нафар ходим машғул. 

Янги иншоотнинг тантанали очилиш маросимида иштирок этган туман таълим бўлими бошлиғи Ў. Қўлдасова, Қорабулоқ қишлоқ округи ҳокими А. Абдуқодиров, туман маслаҳати депутатлари А. Исоқов, 

М. Сиддиқов, А. Ҳасанов ва бошқалар шахсан Президентимиз ташаббуси билан Қозоғистонда давлат-хусусий ҳамкорлиги негизида барпо этилаётган мактабгача тарбия муассасалари кичкинтойларнинг тўлақонли таълим-тарбия олишида катта ўрин тутишини бир овоздан таъкидлаб ўтишди. 

Янги боғчанинг очилишига келган меҳмонлар жажжи болажонларга яратилган шарт-шароитлар билан яқиндан танишаркан, қишлоқда яна бир қанча худди шундай боғчалар барпо этилса, кичкинтойларни боғча билан тўлиқ таъминлаш мумкин эканини қайд этишди. Ўз навбатида боғча тарбияланувчилари ҳам дўстлик, она-Ватанни мадҳ этувчи куй-қўшиқлари билан катталарни хушнуд қилишди. 

 Ўша куни Оқсувкентда яна битта, яъни тадбиркор Қурбонтой Давлетовга қарашли “Ҳасан” болалар боғчасининг қўшимча биноси тантанали равишда очилди.