Вилоят ҳокими Жансейит Туймебаев ишдан кейин шаҳар ҳокимлиги ходимлари билан биргаликда Шимкентнинг бир қатор кўчаларини оралаб, тозалаш ва ободонлаштириш ишлари билан танишди.

Минтақа раҳбари мутасадди бошқармалар раҳбарларига Шимкент канали атрофида шанбалик уюштириш вазифасини юклади.

Бундан ташқари, Жансейит Қансейитули вилоят ҳокимлигининг WhatsApp тармоғига шаҳарнинг санитария аҳволи тўғрисида кўплаб арзлар келиб тушаётганини айтиб, шаҳарни ободонлаштириш – ҳокимликнинг кундалик вазифаси эканлигини уқтирди. Шунингдек, пиёдаларга мўлжалланган йўлакчалар атрофини кўкаламзорлаштириш ва гулзорлар барпо этиш, шаҳар фуқаролари ва меҳмонлари учун Арбат каби махсус дам олиш масканлари қуришни топширди. 

“Қиял әлемі” хиёбонининг фаолияти билан танишган ҳоким, у ерда сайр қилиб юрган ёшлар билан суҳбатлашди. Шаҳарнинг ҳар бир фуқароси она юртининг гуллаб-яшнаши, кўкаламзорлашиши, тоза ва озода бўлишига ҳисса қўшиши кераклигини айтган ҳоким ёшларни шаҳарни тозалаш ишларида фаол қатнашишга даъват этди.