Мустақил Қозоғистонда ёшларнинг ҳар томонлама билимли, зукко, бир сўз билан айтганда, баркамол бўлиб вояга етишлари учун етарли шарт-шароитлар яратилмоқда. Элбошимиз Н. Назарбаев ўзининг жорий йилги Мактубида ўсиб келаётган авлод вакиллари ота-боболарининг муносиб издошларига айланишларини, қолаверса, ривожланган давлатлардаги тенгдошларидан қолишмасликлари учун замонавий билимни пухта эгаллашлари кераклигини бот-бот таъкидлаган. Ёшларимиз ҳам, ўз навбатида, кўрсатилаётган бундай ғамхўрликка шижоатли меҳнатлари билан жавоб қайтаришмоқда. 

Куни кеча Сайрам туманидаги Қорабулоқ қишлоқ округи ҳокимлиги ташаббуси билан қишлоқ маданият уйида “Мангу Эл ёшлари” деб номланган форумнинг уюштирилгани бежиз эмас. Маҳаллий ёшларга давлат томонидан кўрсатилаётган имтиёзларни кенг тушунтиришни ўз олдига мақсад қилиб қўйган ушбу тадбирда Сайрам тумани ҳокими С. Сапарбаев, муовини М. Ўразалиев, таълим бўлими мудираси Ў. Қўлдасова ва бошқалар иштирок этишди.

Самат Айдарханули, маҳаллий йигит-қизлар томонидан тайёрланган ҳунармандчилик буюмлари кўргазмасини томоша қиларкан, уларнинг маҳоратига қойил қолганини яширмади.

 Туманнинг турли чеккаларидан келган йигит-қизлардан ташқари туман иш билан таъминлаш бўлими ходимлари иштирок этган мазкур форум сўнгида қатнашчилар томонидан туман ёшларига Мурожаатнома қабулланди.

Бу сингари тадбирларнинг тез-тез уюштириб турилиши ёшларимизни янги марралар сари ундаши турган гап.

 Суратларда: тадбирдан лавҳалар.