Аввал хабар қилганимиздек, Сайрам туман ўзбек этномаданият бирлашмасининг ташаббуси билан ташкиллаштирилган “Офарин-2018” танловининг биринчи босқичи 15 май куни Оқсувкент қишлоғидаги туман Маданият уйида ўтади.

Танловнинг асосий мақсади вилоятимиздаги ёш истеъдодларни аниқлаш ва уларни халқимизга таништириш, ўзбек миллий мусиқасини оммавийлаштириш, чолғу асбобларини чалишни ёшларимиз орасида тарғиб этиш, уларнинг номлари, тарихини ўрганиш ва келажак авлодга етказиш, ёш санъаткорларда саҳнада ўзини тутишга кўникма ҳосил қилиш, истеъдодли ёшларни рағбатлантиришдан иборатдир. 

Унда истеъдодли ҳамюртларимиз ўз маҳоратларини синаб кўрадилар. 

Танловда иккита, мумтоз қўшиқ ҳамда санъаткорнинг ўз қўшиғи жонли ижро этилиши шарт. 

Унда ҳар бир санъаткор ўз гуруҳи билан иштирок этиши мумкин. Қўшиқлар 10 дақиқадан чўзилиб кетмаслиги керак. 

Махсус сайланган ҳакамлар ҳайъати иштирокчиларни баҳолашда уларнинг ижрочилик маҳорати, кийиниши, саҳнада ўзини тутиши, жонли ижро маданияти, миллий мусиқа асбобларидан фойдаланиши, танланган мавзунинг мазмунини ҳам эътиборга олади.

Танловда қатнашиш учун номзодлар ўзлари истиқомат қиладиган ҳудуддаги ўзбек этномаданият бирлашмасига манзили, исм-шарифи, отасининг исми, қўшиқ номи, муаллифлари, телефон рақами, туғилган санаси ҳақидаги маълумотлар билан ариза беришлари лозим.

Танлов ғолиблари пул мукофотлари ҳамда қимматбаҳо совғалар билан тақдирланадилар.

Ўзингизни қизиқтирган саволлар бўйича Қодиржон Саидов (8 702-491-40-28) ва Ирисбек Ашурбеков (8 701-489-94-48)ларга мурожаат этишингиз мумкин. 

Ёш қўшиқчилар танловига барчангизни таклиф этамиз!