Туркистон шаҳридаги ўзбекзабон энг йирик мактаблардан бири Ҳикмат Ажиметов раҳбарлик қилаётган А. Навоий номли даргоҳ ҳисобланади. Ўтган ойда фаол ўқитувчилар ва ота-оналардан иборат 20 кишилик ташкилий қўмита тузилиб, мактабнинг 90 йиллик юбилейига тайёргарлик режалари белгиланди. 

Мактабнинг ҳар иккала ўқув корпуси ўтган асрда бунёд этилган. Жорий йилда икки қаватли эски бино давлат бюджети ҳисобидан таъмирланади. Ободонлаштириш, таъмирлаш, қурилиш ишлари учун маблағ зарурлиги боис «Мактабга йўл» акцияси ташкил этилди. 

Мажлислар зали ота-оналар, ҳомийлар ва ҳимматли инсонлар билан гавжум. Директор Ҳ. Ажиметов галдаги режаларига тўхталди. Туркистон шаҳрининг фахрий фуқароси, ХҚТУ клиникаси олий тоифали кўз шифокори Баҳодир Ҳабибуллаев, фармацевтика бўйича олим, мактабни 1959 йили “олтин медаль” билан битирган тиббиёт соҳаси устози Абдурайим Юсупов, фахрий дизайнер, ҳунарманд Носир Ҳамроқулов, «Ақ жол» қурилиш ташкилоти раҳбарининг ўринбосари Рўзимуҳаммад Ризоев, «Гранд Микс» корхонасидан Мирзамаъруф ота, мутасадди Маъмиржон Эргаш ўғли, фахрий темирйўлчи Эркин Қолимбетов, Чоға қишлоғидан фахрий ветеринар Одил Меҳмонхўжаев, «Үлес» хайрия жамғармаси раиси Райимжон Қўчқоров, устоз Қодир Сулаймонов, меҳнат фахрийси Озода Зарипова каби ўнлаб инсонлар мактаб юбилейига фаол тайёргарликни қизғин қўллаб-қувватладилар. 

Б. Ҳабибуллаев Навоий номли мактабни тамомлаган кўплаб собиқ битирувчилар Тошкент шаҳрида эканлигини таъкидлаб юбилейга тайёргарлик дарагини уларга ҳам етказиш таклифини айтди. 

«Мактабга йўл» акциясида ота-оналар қўмиталари, фан бирлашмалари етакчилари, устозлар, ҳомийлар фаол қатнашдилар. Акция бошланди ва юбилейга қадар давом этади. Барча собиқ ўқувчиларни қадрдон мактаблари ободончилиги, кўркамлиги йўлидаги саъй-ҳаракатларга муносиб ҳисса қўшишга чақирамиз. 

А. Навоий номи ва тимсоли мисли қуёш барчага баравар қадрли. 

Алоқа телефони: 2-62-89.