Маълумки, жорий йилда МДҲ давлатларида бўлгани каби, Қозоғистонда ҳам Буюк Ғалабанинг 73 йиллиги кенг нишонланади. Ушбу сана муносабати билан Сайрам туманида Улуғ Ватан уруши фахрийлари ва уларга тенглаштирилган шахслар, “пок оналар”, ногирон фахрийларнинг турмуш ўртоқлари ҳамда уруш йилларида собиқ Иттифоқ давлат хавфсизлик ва ички ишлар органларида хизмат қилган ҳарбийларга моддий ёрдам кўрсатиш кўзда тутилган. 

Туман бандлик ва ижтимоий дастурлар бўлими ногиронлар ва фахрийлар билан ишлаш шўъбасининг бош мутахассиси Асхат Гарифулининг маълумотига кўра, айни пайтда тўққиз нафар уруш фахрийси ҳаёт. Уларнинг ҳар бирига ойлик ҳисоб кўрсаткичининг 100 баравари  миқдорида ёрдам пули берилади. Жами 1182 нафар фронторти меҳнаткаши ҳамда жангчиларнинг беваларига ҳам ойлик ҳисоб кўрсаткичининг беш баравари миқдорида моддий ёрдам кўрсатиш кўзда тутилган. Булардан ташқари, юқорида таъкидланган ногирон фахрийларнинг турмуш ўртоқлари ҳамда уруш йилларида давлат хавфсизлик ва ички ишлар идораларида хизмат қилган ҳарбийларга ойлик ҳисоб кўрсаткичининг беш баравари миқдорида пул ажратиш режалаштирилган.

Туманда, шунингдек, 177 нафар Афғон уруши фахрийси яшайди. Тинчлик пайтида ҳарбий хизматини ўташ чоғида ҳалок бўлган ҳарбий хизматчиларнинг оилалари эса 14та. Уларга Наврўз байрами муносабати билан беш ойлик ҳисоб кўрсаткичи миқдорида ижтимоий ёрдам кўрсатилган бўлса, 29 нафар Чернобиль АЭС фожиасини бартараф этишда қатнашган 14 нафар ҳамюртимизга ҳам шу миқдорда моддий кўмакни 7 Май – Ватан ҳимоячилари байрами муносабати билан бериш белгиланган. Семей полигони қатнашчиларига эса бундай ижтимоий кўмакни 29 августда бериш кўзда тутилган.

Бир сўз билан айтганда, сайрамликлар она Ватанни ғанимлардан мардларча ҳимоя қилган ўғлонларни унутмайди. Шу тоифадаги шахсларга туман бюджети ҳисобидан ажратилаётган ижтимоий ёрдам пули бунга яққол мисолдир.