Вилоят ҳокими Ж. Туймебаев раислигида шаҳарсозлик кенгашининг мажлиси ўтди. Унда Шимкент шаҳрида амалга оширилиши кутилаётган “Shymkent City” тадбиркорлик ҳамда уй-жой мажмуаси лойиҳаси муҳокама қилинди. Яъни, янгидан барпо этиладиган шаҳарчанинг концепциясига  қатор ўзгаришлар ва қўшимчалар киритилиши ҳақида гап борди.

Мажлисда минтақа раҳбари Шимкент шаҳрида аҳоли сони ўсаётганига эътибор қаратиб, “Shymkent City” лойиҳасининг баъзи томонларини қайтадан кўриб чиқиш лозимлигини таъкидлади.

– Элбоши назаридаги ушбу лойиҳанинг баъзи жойларига тузатиш киритиш керак, деб ҳисоблайман. Шимкент элимиздаги учинчи мегаполис бўлгани боис, бу ерда демографик ўсим юқори. Келажакда аҳоли сони яна ортишини инобатга олсак, шаҳарда транспортда юриш муаммога айланиши сўзсиз. Шунинг учун янги шаҳарда автобекатлар етарли бўлишини, шунингдек, транспорт тиқилинчининг олдини олиш йўлларини ҳозирдан ўйлашимиз керак. Тегишли соҳа мутахассисларига ушбу масалани қайтадан кўриб чиқишни топшираман, – деди Жансейит Туймебаев.

Мажлисда қатнашган масъул шахслар минтақа раҳбарининг таклифларини қўллаб, келгусида бажариладиган ишларини шарҳлаб беришди.

Лойиҳа муаллифлари таклиф қилган сўнгги нусха бўйича майдони 65,5 гектарни ташкил этадиган “Shymkent City” мажмуасида 6762 ўринга мўлжалланган автотураргоҳ қуриш режаланган. Ҳаммаси бўлиб 5554та квартирадан иборат 18та кўп қаватли уй бунёд этилади. Замонавий лойиҳа асосида мактаблар, спорт мажмуаси, ҳордиқ марказлари ҳамда ижтимоий иншоотлар қад кўтаради.

Таъкидлаш жоизки, “Shymkent City” шаҳарнинг шимолий қисмида, Байдибек бий ёдгорлиги қошида барпо этилмоқда. Мажмуа замонавий инфратузилмаси, бизнес учун қулай шароитлари ҳамда энг юксак  меъморий жиҳатлари билан ажралиб туради. Лойиҳа Шимкентни 2020 йилгача ривожлантириш концепцияси доирасида амалга оширилмоқда.