Ҳурматли Ватан ҳимоячилари!

Сизларни мамлакатимизнинг шонли айёми – 7 май – Ватан ҳимоячилари куни билан табриклаймиз!

Ҳар бир Мустақил давлатнинг энг олий мақсади – эл тинчлигини ҳимоя қилиш, давлат яхлитлигини сақлаш. Шунинг учун ҳам бу кун – Ватанни қадрлайдиган, унинг тарихини ҳурмат қиладиган, жасур аскарларимизнинг номини юксакларга кўтарадиган, давлатимизнинг куч-қудратини шарафлайдиган кун.

Бугунги кунда Элбоши, Қозоғистон Қуролли Кучларининг Бош қўмондони Нурсултан Назарбаевнинг стратегик сиёсати натижасида Қозоғистон армиясининг янги қиёфаси, ватанпарварлик руҳи шаклланди. Қуролли Кучлар мамлакатимизнинг ишончли қалқонига айланди.

26 йил муқаддам ташкил қилинган Қозоғистон Қуролли Кучлари элимиз қаддини тиклаб, эркинлигимизни кенгайтирди. Вақт талабига мувофиқ армиямиз янгиланиб, куч-қудрати йилдан-йилга ошиб бормоқда.

Конституциямиз билан тасдиқланган нуфузли вазифани бажариш учун Жанубий Қозоғистон вилоятидан кўклам ҳамда кузда соғлиги мустаҳкам бир неча юзлаб йигитлар Қуролли Кучлар сафларига чақирилади. Улар ҳарбий тайёргарликдан сўнг махсус қисмларда, чегара хизматида эл осойишталигини кузатиб туришади.

Сарбозларимиз ҳар қачон ҳурмат ва эътирофга лойиқ. Бор умрини Ватан ҳимоясига бағишлаб, хизматини астойдил бажариб келаётган ҳарбийларга миннатдорчилигимизни билдирамиз. Элимизнинг осойишталигини сақлаш йўлидаги масъулиятли хизматларингизда сизларга шижоат, мустаҳкам соғлик, оилаларингизга омонлик тилаймиз!