Қадрли жанубийқозоғистонликлар!

Сизларни 9 май – Буюк Ғалаба байрами билан чин юракдан табриклаймиз!

Бу – Ватанни ҳимоя қилишдаги сўнмас мардлик ва мислсиз шуҳратнинг, халқимизнинг чексиз қаҳрамонлиги ва тенгсиз куч-ғайрати тан олинадиган шонли сана.

Тинч ҳаёт ва авлоднинг бахтли келажаги учун ўт-сув кечиб, қайғу-ҳасрат чеккан, уларнинг барчасини матонат билан енга олган фахрийларнинг чинакам жасорати ва меҳнати ёдимиздан ҳеч қачон ўчмайди. Сизлар кўрсатган сабот-матонат, ҳақиқий ватанпарварлик, кўп миллатлар тотувлигининг беқиёс намунаси бўлиб, тарихда қолди. Шунинг учун ҳам машаққатли йиллардаги ота-боболаримизнинг фидойилиги ва мардлиги ҳамда фронторти меҳнаткашларининг заҳматлари олдида биз ҳар доим ҳурмат билан бош эгамиз. Синовли дамларда кўксини ўққа тутган қаҳрамонларга алоҳида эъзоз кўрсатиш бугунги авлоднинг фарзандлик бурчи.

Қозоғистон Республикаси Президенти, Элбошимиз Нурсултан Назарбаев: “Мардлик ва қаҳрамонлик, Ватанга бўлган муҳаббат суронли урушда Ғалабага йўл очиб берди”, деган эди. 

Улуғ Ватан урушига Жанубий Қозоғистон ўлкасидан 140 мингдан кўпроқ киши отланиб, уларнинг деярли ярми она юртига қайтиб келмади. Иккинчи жаҳон урушида жонини ҳам аямай жасорат кўрсатган 51 нафар ҳамюртимизга Совет Иттифоқи Қаҳрамони унвони берилган бўлса, 8 нафари “Шуҳрат” орденининг соҳиби бўлди. Жасурлиги учун минглаган фахрийларимиз турли орден, медаллар билан тақдирланди. Бугунги кунда минтақамизда 174 нафар Улуғ Ватан уруши фахрийси, 4885 уруш иштирокчиси ва ногиронларга тенглаштирилган шахслар ҳамда 15 733 фронторти фахрийлари бор.

Ҳурматли Улуғ Ватан уруши фахрийлари ва фронторти меҳнаткашлари!

Суронли кунлардаги ҳалол меҳнатингиз ва фаол фуқаровий тамойилларингиз учун сизларга ташаккур билдирамиз. Ўша мардликка йўғрилган кунлар тарихимизнинг мангу унутилмас саҳифалари бўлиб қолаверади.

Буюк Ғалаба байрами билан муборакбод этар эканмиз, барчангизга мустаҳкам соғлик, осойишта ҳаёт ва хонадонларингизга қут-барака тилаймиз!