Доимий обуначимиз Файзулла Мирзаҳмедов билан «Чоштепа» мактабига бош суқдик. Файзулла ака шу ерда ўқиган. Устозлари ҳаққи ҳурмати мактаб кутубхонасига 100 дона китоб ҳадя этишга қарор қилганини эшитиб, беихтиёр «Баракалла, барака топинг!» деб юбордим. 

Бунга қадар ҳам М. Қошғарий номли мактаб кутубхонасига 100 дона китобни жавони билан совға қилган фидойи инсоннинг ушбу ибратли иши таҳсинга лойиқ. 

Директор Мансур Акешовнинг кутубхонани бойитиш мақсадида кўп жойларга мурожаат қилганидан ҳам хабардормиз. Хонадонларда бекорга чанг босиб ётган китоблар мактаб кутубхонасидан жой олиб, ёш авлод билими савиясини юксалтиришга хизмат қилса, қандай яхши! 

Шу ўринда Файзулла акага яна бир карра миннатдорчилик билдириб, кўпчиликка ибрат қилиб кўрсатамиз. Унинг «Қарноқ» мактабига ҳам шундай ҳадя қилиш ниятим бор, деган сўзлари замирида қанчалик меҳр, маънавиятга ихлос жамланган. Қанийди, орамизда шундай инсонлар сафи кенгайса! 

Директор Мансур Ғайбулла ўғлининг яқиндагина Алматидаги Назарбаев заковат мактаби қошидаги педагогика маҳорат маркази томонидан «100 китоб, 100 қўшиқ» лойиҳаси асосида интернет танловида ғолиб чиқиб, махсус диплом билан тақдирлангани ҳам диққатга сазовор. Бугунги шиддатли давримизда замон билан ҳамнафас бўлиш – ҳар қачонгидан ҳам муҳим. 

Мактаб кутубхонаси мудираси Мақсуда Юсупова ҳам кутубхонага янги ва нодир бадиий адабиётлар келтирибди, бу ҳам яхшиликдан нишона. Ҳар томонлама саъй-ҳаракатлар пировардида мактаб юраги саналмиш кутубхонанинг янги ва керакли китоблар билан таъминланишига, демакки, ўқувчиларнинг билим савияси юксалишига, фаросатли, ақлли бўлиб вояга етишларига замин яратади. Элбошимиз «Келажакка йўлланма: маънавий янгиланиш» мақоласида айнан мана шу фазилатларни тилга олган.