Қозоғистон Республикаси Президенти, Миллат етакчиси Н. Назарбаев мустақиллик йилларида эл бирлиги, этнослараро тотувликни мустаҳкамлаш, аҳоли фаровонлигини ошириш йўлида оламшумул хизматларни амалга оширгани, бугунги кунда жаҳон ҳамжамияти томонидан эътироф этилмоқда. 

Давлат раҳбари бунга осонликча эришмади. Ҳар бир режасини авваламбор халқимиз эътиборига ҳавола қилди. Йиллар ўтиши билан элимизни тараққиётнинг янги босқичига кўтариш мақсадида қатор давлат дастурларини ишлаб чиқди. Чунончи, Элбошининг “Бешта ижтимоий ташаббуси”ни ғоят муҳим ва ўз вақтидаги мурожаат деб биламан. Бу ҳақда муҳтарам Президентимиз шундай дейди: “Бу қадам анчадан бери ўйимда юрган эди. Бироқ Қозоғистон аввал куч, хазинасига маблағ тўплаб олиши, қувватли элга айланиши лозим эди. Мана, шундай кун келди! Бу – жамиятимиз бирлигини мустаҳкамлаш учун аниқ ишларга астойдил кўчадиган вақт. Биз уни улкан ижтимоий лойиҳаларни рўёбга чиқариш орқали амалга оширамиз”.

Миллат етакчиси юқорида таъкидланган бешта ижтимоий ташаббусини ҳаётга татқиқ этишга тўлиқ замин яратилганини уқтириб ўтади. Шундай бўлгач, “Нұр Отан” партияси ҳам ҳамиша Президентимиз ғояларини қўлловчи куч сифатида эл равнақи йўлида амалга оширилаётган ижтимоий лойиҳаларнинг жойлардаги ижросини назорат қилишни тўлиқ зиммасига олган. 

Сайрам туманида кейинги пайтда аксари муаммолар вақтида ҳал этилаётгани боис, “Нұр Отан” партияси туман филиалига маҳаллий ижро органлари устидан шикоят қилиб келувчилар сони бирмунча камайди. Бинобарин, партия барибир ҳамюртларнинг дардини бемалол баён қила оладиган “нажот қалъаси” бўлиб қолмоқда. Зеро, мамлакатимиздаги етакчи партия – “Нұр Отан”ни бошқараётган Элбошимиз ҳар жабҳада одиллик, ҳалолликни устун қўяди.