Жорий йилги Халқаро ҳамширалар куни Жаҳон соғликни сақлаш ташкилоти томонидан “Саломатлик – инсон ҳуқуқи, уни таъминлашда ҳамшираларнинг ўрни ва истиқболи” шиори остида ўтказилмоқда.

Шаҳардаги вилоят опера ва балет театрида Халқаро ҳамширалар кунига бағишланган тантанали тадбир уюштирилди.

Унда вилоят ҳокими Ж. Туймебаев барча тиббиёт ходимларини касбий байрамлари билан қутлаб, аҳолига малакали тиббий ёрдам кўрсатишда ҳамкасбларига ўрнак бўлаётган ўрта тиббиёт ходимларидан бир гуруҳига минтақадаги санаторийларга 20та йўлланма ва телевизорлар тақдим этди.

Тантанада соҳа пешқадамлари вилоят ҳокими, вилоят маслаҳати ва “Нұр Отан” партиясининг Фахрий ёрлиқлари ҳамда Ташаккурномалари билан тақдирланди. Шунингдек, 11 нафар тиббиёт ходимига “Энг яхши ҳамшира” номинацияси берилиб, қимматбаҳо совғалар топширилди.

Бугун вилоятдаги тиббиёт муассасаларида 25 мингдан зиёд ўрта тиббиёт ходимлари аҳолига хизмат кўрсатиб келади. Жорий йилда соҳа хо­димлари малакасини ошириш мақсадида Тур­кияга йўлланма бериш ҳам режалаштирилган.

Ҳамшираларнинг байрами концерт дастури билан давом этди.