Минтақа раҳбари Ж. Туймебаев Қозоғистондаги Хитой Халқ Республикаси Шэньси вилояти Ҳукумат ваколатхонасининг раҳбари Чэн Хэ бошчилигида келган сармоядорлар билан учрашди.

Учрашув чоғида томонлар икки давлат ўртасидаги иқтисодий алоқаларни мустаҳкамлаш, истиқболли лойиҳаларни ҳамкорликда амалга ошириб, вилоят миқёсида саноат корхоналари очиш масалаларини муҳокама қилишди.

Учрашувда вилоят ҳокими меҳмонларни минтақамизнинг иқтисодий салоҳияти билан таништириб, ишлаб чиқариш корхоналари очишга бел боғлаган сармоядорларга барча имкониятлар яратилишини таъкидлади.

– Ўзингизга маълум, Қозоғистон ва Хитой ўртасида стратегик алоқалар ўрнатилган. Бунинг натижасида икки давлат ўртасидаги товар айирбошлаш 10,4 млрд. АҚШ долларини ташкил этди. Бизнинг вилоятнинг ўзида Хитой компаниялари иштирокида 5та лойиҳа амалга оширилмоқда. Келгусида сизлар билан дипломатик муносабатларни мустаҳкамлаб, биргаликда сармоявий лойиҳаларни жорий этамиз, – деди Жансейит Қансейитули. 

Меҳмонлар ўз навбатида вилоятимизда қўрғошин ва рух қолдиқларини қайта ишлайдиган завод қуриш ниятида эканликларини айтишди. Умумий қиймати 4,8 млрд. тенгени ташкил этадиган лойиҳа йил сайин 300 минг тонна чиқиндини қайта ишлаш имкониятига эга. Завод ишга туширилса, 100дан зиёд одам иш билан таъминланади. 

Шунингдек, вилоят ҳокими хитойликларни икки томонлама меморандум имзолашга чақирди. Минтақамизда етиштирилаётган қишлоқ хўжалик маҳсулотларини Хитойга экспорт қилиш ҳақида ҳам фикр алмашилди. Бундан ташқари, ҳоким электр қуввати билан юрадиган машина заводини жанубда қуришни таклиф қилди. Меҳмонлар таклифларни қўллаб, мазкур лойиҳаларни биргаликда амалга оширишга тайёр эканликларини билдиришди.